2026, TATOLI,I.P sei destaka tan jornalista iha munisípiu hitu
DILI, 29 novembru 2025 (TATOLI) – Sekretáriu Estadu Komunikasaun Sosiál (SEKOMS) garante katak tinan-2026 ne’e, instituisaun mídia estatál, Ajénsia notiosioza Timor-Leste, TATOLI,I.P sei halo tan rekrutamentu ba jornalista na’in-hitu hodi destaka ba iha munisípiu sira.
“Orsamentu Jerál Estadu foin lalais pasa ne’e iha mós aumentu uituan ba TATOLI ho nuneee sira sei halo rekrutamentu ba munisípiu hitu ne’ebe seidauk iha korrespondente. Tinan-2026 sira sei halo rekrutamentu,” Sekretáriu Estadu Komunikasaun Sosiál, Expedito Loro Dias Ximenes, hato’o ba TATOLI, hafoin partisipa komemorasaun loron proklamasaun independénsia da-50 iha Arkivu no Muzeu Rezisténsia Timor-Leste (AMRT), ohin.
Membru Governu ne’e mós husu ba Konsellu Diretivu TATOLI,I.P lideradu hosi Prezidente Noémio Mateus Falcão katak rekrutamentu ne’e tenke rekruta joven ka jornalista sira ho orijen tenke munisípiu no labele hela ka foti fali husi Dili, kapitál.
“Tenke rekruta joven ne’ebé hela iha munisípiu hitu ne’e nian. Labele hili iha Dili mak transfere ba munisípiu atu nune’e bele koñese di’ak liu ambiente,” nia énfaze.
Ezekutivu ne’e salienta, alende rekrutamentu TATOLI,I.P mós sei iha tan atividade seluk.
“Haree husi orsamentu ne’ebe sira tau, se la sala 100 mil dólares amerikanu ba 2026 maibé sei fahe balun, sei halo ba atividade seluk no balun halo ba rekrutamentu,” nia dehan.
Entretantu, Munisípiu sira ne’ebé jornalista destakadu TATOLI,I.P seidauk iha mak Lautein, Manatutu, Aileu, Ainaru, Ermera, Likisá no Manufahi.
Jornalista: Ivonia da Silva
Editór: Rafael Ximenes de A. Belo
