DILI, 02 Dezembru 2025 (TATOLI)—Prezidente Ajénsia Notisioza Timor-Leste TATOLI. Impreza Públiku (TATOLI, I.P), Noémio Falcão, solisita jornalista Tatoli atu mantein kualidade informasaun ba públiku.
Notísia Relevante: Retiru anuál TATOLI destaka Transforma Frakeza ba Forsa hodi Serbí
“Informasaun iha kualidade mak hetan konfiansa husi públiku, tanba bainhira kualidade informasaun laiha, audiénsia sei lee fali informasaun husi mídia sira seluk,” Prezidente TATOLI ne’e hateten bainhira hala’o abertura ba enkontru no retiru anuál 2025 ho tema “TRANSFORMA FRAKEZA BA FORSA HODI SERBÍ” ne’ebé Ajénsia TATOLi realiza iha Dare, ohin.
Dirijente ne’e afirma, servisu iha mídia tenke multitarefa (one men one tim) katak jornalista labele hatene hakerek de’it konteúdu notísia, maibé tenke kriativu hodi prodús informasaun seluk liuhusi vídeo ka reportajen direta.
“Maske ita sei menus fasilidade maibé ho Orsamentu Jerál Estadu (OJE) 2026 aprovadu ona iha Parlamentu Nasionál, ita sei bele sosa tan ekipamentu hodi apoiu servisu redasaun no administrasaun nian,” nia dehan.
Nia hatutan, jornalista tenke iha koñesementu kle’an kona-ba asuntu polítika, ekonómia, desportu no seluk tan, katak hanesan jornalista ida labele hatene de’it mak asuntu ida.
Reprezentante jornalista lian Indonézia iha Tatoli, Cidalia Fátima, hateten maske sira iha difikuldade ba forsa traballu, fasilidade no formasaun hodi garante kualidade informasaun maibé nia sei esforsu hodi hala’o servisu ho di’ak atu públiku nafatin asesu informasaun.
“Ho rekursu umanu ne’ebé natoon maibé ami bele ezekuta servisu ho di’ak tanba iha liña koordenasaun ba malu,” nia dehan.
Nia hatutan, durante ne’e sira la’ós apoiu informasaun iha eskrita maibé apoiu mós halo vídeo no imajen. Aleinde ne’e, daudaun ne’e sira mós partisipa formasaun jornalizmu nian husi parseria sira atu kapasita koñesementu iha área ida-ne’e.
Enkuantu, totál jornalista ne’ebé hakna’ar-an iha Ajénsia Tatoli hamutuk na’in 18 kompostu husi jornalista nasionál na’in 13 no jornalista destakadu iha munisípiu hamutuk na’in-lima (5).
Enkontru avaliasaun servisu anuál 2025
Entretantu, Prezidente Ajénsia Notisioza Timor-Leste, Noémio Falcão, hateten objetivu husi enkontru ne’e sei prioriza ba avaliasaun dezempenu servisu durante tinan 2025 no preparasaun planu ba implementasaun programa tinan 2026.
“Avaliasaun atu identifika frakeza durante ne’e no atinjimentu sira, tanba ne’e atu transforma funsionamentu sira iha Tatoli, atu hotu-hotu hala’o servisu tuir ninia dalan,” nia dehan.
Tanba, nia dehan, iha Ajénsia Tatoli iha diresaun administrasaun no parte redasaun nian ne’e, tenke servisu hamutuk hodi bele fó kontribuisaun ba instituisaun.
Vise Prezidente ba Asuntun Asuntu Mídia no Jornalístika, Zezito da Silva, hateten avaliasaun anuál ida-ne’e aleinde haree atinjimentu no frakeza sira, presiza haree liuhusi planu asaun anuál atu nune’e bele la’o tuir matadalan no programa ne’ebé define ona kada tinan.
Avaliasaun dezempenu servisu transmite informasaun husi versaun testu nian hahú husi fulan-Janeiru to’o Novembru hamutuk 13.181 enkuantu iha meta PAA hamutuk 9600, iha fali fotográfia hamutuk 6.113 tuir meta 2500, produsaun vídeo hamutuk 1.309 iha meta 200 no infográfia totál 397 ho meta 48, signifika rezultadu servisu atinje maka’as liu meta ne’ebé iha.
“Maske ita iha dezafiu funsionamentu servisu iha Ajénsia Tatoli mak rekursu umanu, tanba ita iha forsa traballu ne’ebé menus bele difikulta mós funsionamentu servisu liuliu servisu redasaun nian ne’ebé atu transmite informasaun ba públiku,” nia dehan.
Vise Prezidente ba Asuntu Administrasaun no Finansa, Madalena Carlos, relata reuniaun ida ohin ne’e hanesan enseramentu dezempeñu servisu tinan 2025 nian, maibé funsionamentu servisu kontinua la’o.
“Labele halo komparasaun nivel servisu iha instituisaun ida tanba funsionamentu jestaun servisu ne’ebé la’o ho di’ak, tanba iha lina koordenasaun no kooperasaun ne’ebé mak forte tebes,” nia dehan.
Aleinde ne’e, nia hatutan, hahú husi fulan-Jeneiru to’o Novembru ne’e Ajénsia Notisioza Tatoli rekolla reseita ba kofre Estadu hamutuk $9.014.35 liuhusi publisidade.
Jornalista : Alexandra da Costa
Esitór : Cancio Ximenes
