DILI, 16 Dezembru 2025 (TATOLI)–Diretór Nasionál Servisu Prizionál no Reinsersaun Sosiál Soasiál iha Ministériu Justisa (MJ), Delfio Soares, informa, Guarda Prizionál na’in-hitu daudaun ne’e sofre moras.
“Tuir ha’u simu ne’e, iha Suai laiha, iha Glenu ne’e iha na’in-tolu no iha Bekora iha na’in-haat,” Diretór hateten Jornalista sira iha ninia knaar fatin, MJ, Kolmera Tersa ne’e.
Nia dehan, Guarda Prizionál sira ne’e balun sofre moras stroke kma’an no balun iha diabetes. Tanba ne’e, Diresaun Nasionál sempre fasilita no halo desizaun ba sira hodi bele kontinua serbisu no husu rekomensaun husi Doutór sira bainhira presiza.
Notísia relevante : MJ seidauk konklui estatutu Guarda Prizionál
Ho situasaun sira ne’e mak MJ atu selebra akordu kooperasaun serbisu ho Ministeriu Saúde (MS) iha tinan oin atubele halo transferénsia Guarda Prizionál ne’ebé mak moras halo tratamentu iha rai-li’ur hanesan mós sidadaun sira seluk.
“Iha ami-nia planu, ami hakarak armoniza mós sira-nia pozisaun no kondisaun hanesan mós ba ita-nia pasiente komún, sira mós bele asesu para hetan rekomendasaun atubele hetan tratamentu ba iha li’ur, hanesan mós ita-nia sidadaun sira seluk seluk, planu ne’e husi Diresaun Nasionál sei einkaixa iha tinan oin para ami bele einkaixa iha ami-nia memorandu,” nia akresenta.
Delfio dehan, atu evita Guarda Prizionál sira labele moras arbiru mak tenke halo jinástika barak, tanba ne’e iha kada loron sesta, Estabesimentu Prizionál tolu tenke realiza jinástika.
Estabelesimentu Prizionál sira mós prepara hahan tasak ne’ebé balansu hodi kuidadu Guarda Prizionál sira-nia saúde.
Jornalista : Natalino Costa
Editora : Julia Chatarina
