DILI, 18 Dezembru 2025 (TATOLI)-Sekretariu Estadu Kooperativa (SEKoop) realiza semináriu kona-ba dezenvolvimentu Bafo Kayrala nu’udar produtu estratéjiku ba harii indústria no ekonomia ne’ebé reziliente no sustentavel iha Timor-Leste (TL).
Sekretáriu Estadu Kooperativa, Arsénio Pereira, informa katak semináriu ne’e hala’o hamutuk ho empreza Heineken nu’udar alternativu ida hodi hakbesik-an ba empreza kona-ba utilizasaun Bafo Kayrala hanesan matéria prima ba serveja, bebida alkoólika, no seluk tan.
“Objetivu husi semináriu ida-ne’e maka dahuluk, atu promove produtu sira Bafo Kayrala nian, tanba Programa Governu nian ba Bafo Kayrala nu’udar valór ekonómiku, sosiál no ambientál, nune’e oinsá ita bele divulga informasaun sira ne’e atu ema hotu hatene kona-ba produtu ida-ne’e”, Arsénio Pereira hateten iha Universidade Katólika Timorense, Balide Dili, ohin.
Nia esplika katak produtu Bafo Kayrala rasik la’ós de’it prosesa ba ai-han sira hanesan dosi, kosmétika, no seluk tan, no daudaun bele halo prosesamentu ba tua, nune’e empreza Heineken husu produtu Bafo Kayrala tonelada 50 atu halo produsaun serveja no bebida alkólika sira seluk.
“Tuir análize laboratóriu sira Heineken nian, Bafo bele uza iha produsaun serveja no bebida alkoólika sira seluk. Tanba ne’e, ami konvida movimentu kooperativa no inisiativa privada hodi konsulta diretamente ho empreza kona-ba kuantidade tonelada hira maka presiza”, nia hateten.
Daudaun produtu ne’e rasik kolleita ona tonelada 155,57 husi ektare 199 iha territóriu laran.
Sekretáriu-Jerál Bafo Kayrala husi Munisípiu Ermera, Lino Guterres Noronha, hateten produtu Bafo Kayrala nia kualidade di’ak tebes tanba bele uza halo produsaun ba ai-han sira seluk.
“Hanoin ida-ne’e di’ak tebes oinsá ha’u bele esforsu, liuliu hasa’e produsaun Bafo Kayrala ne’e rasik”. nia hateten.
Nia haktuir katak produtu ne’e rasik kada tinan kolleta tonelada 10 liu no tun liu tonelada 4.
Notísia relevante: SEKoop kolleta Bafo Kayrala tonelada 88
Jornalista: Arminda Fonseca
Editora: Maria Auxiliadora
