DILI, 22 Dezembru 2025 (TATOLI)—Ministru Obra Públika (MOP), Samuel Marçal, orienta ona Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P, sigla portugés) apoiu hodi fó asisténsia ba problema emerjénsia ne’ebé akontese iha tempu udan hanesan inundasaun no rai halai liuhusi brigada ne’ébé destaka ona iha territóriu nasionál.
“Ida-ne’e la’ós koordenasaun maibé ne’e tenke orienta tanba IGEADI mak iha mákina boboot hodi halo jestaun ba problema dezastre naturál nian. Nune’e, ha’u ko’alia ona ba sira hodi tau atensaun ba ida-ne’e, hanesan foin lais iha fulan-Outobru ne’e sira hasai sedimentasaun sira iha área ne’ebé sai inundasaun iha Dili laran,” Ministru Obras Públikas, Samuel Marçal, informa ba Agência Tatoli iha nia kna’ar fatin, Kaikoli, ohin.
Nia hatutan, apoiu emerjénsia ne’e sei hala’o iha munisípiu hotu ne’ebé IGEADI destaka ona ninia ekipa brigada sira hanesan iha Maliana, Suai, Natarbora, Dili no Baukau.
Entretantu, kada brigada ida sempre fahe ba pakote rua ka tolu, iha brigada Maliana ninia área kobertura iha Bobonaru, Likisa, Ermera.
Brigada Suai nia kobre ba área iha Suai no Ainaru, brigada Natarbora nia área kobertura iha Manatutu no Manufahi.
Brigada Baukau ninia área kobertura iha Baukau, Vikeke no Lautein, no brigada Dili ninia área kobertura iha Aileu no Likisa sorin balun.
Jornalista : Alexandra da Costa
Editór : Cancio Ximenes
