OEKUSI, 06 Janeiru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA) Régio da Cruz Salu, informa katak, daudaun ne’e hala’o diskusaun ho parte tékniku husi Diresaun Rejionál Terra no Propriedade atu haree legalidade kona-ba direitu propriedade ba komersiante 146 ne’ebé hetan despezu administrativu hosi Sekretáriu Estadu Asuntu Toponímia no Organizasaun Urbana (SEATOU).
Notísia relevante:Negosiante merkadu Numbei husu Autoridade RAEOA prosesa lalais indemnizasaun
Autoridade másima Oekusi ne’e orgullu tanba antes ne’e komersiante sira koopera di’ak ho Governu hodi hamamuk fatin, atu fó oportunidade ba Autoridade RAEOA hadi’a merkadu referidu.
“Ha’u sei kontinua ko’alia ho dirijente sira husi terra propriedade hodi ita haree nia aspetu legalidade kona-ba direitu ba propriedade no kontribuisaun ba dezenvolvimentu Estadu no ita-nia rai nian, katak buat ne’ebé afeta ba propriedade ita sei haree parte legalidade ne’ebé regula ona diretu sidadaun nian iha nia propriedade rasik, depois maki ta sei haree rekuperasaun ka kompensasaun,” nia hateten iha Oekusi.
Tuir nia, daudaun ne’e empreza hahú aterru ba faze konstrusaun, tan ne’e husu ba komersiante ho pasiénsia hodi akompaña prosesu, tanba intensaun husi Autoridade RAEOA hakarak moderniza atividade fatin komersiu iha futuru.
“Ita hotu hatene, faze dahuluk kona-ba dezenvolvimentu infraestrutura merkadu foun Numbei konstrusaun la’o hela, ita kontinua akompaña, nune’e merkadu foun sai fatin dignu ba komersiante sira, asuntu ligadu ba afeta sira-nia propriedade fíziku ita sei haree iha kontextu haforsa komersiante sira atu bele sai komersiante ida-ne’ebé garantia ekonomia Oekusi ho família ne’ebé dignu,” nia hateten.
Notísia relevante:Uma-kain haat iha merkadu Numbei seidauk sai, Autoridade husu atu koopera
Entretantu antes ne’e, iha loron 24 Marsu 2025, ekipa konjunta liderada hosi Sekretáriu Estadu Asuntu Toponímia no Organizasaun Urbana (SEATOU), fó ona xamada atensaun ba vendedór sira-neʼebé halo uma no hela permanente iha merkadu Numbei, katak hahú loron 24 Marsu to’o loron 24 Abríl 2025 tenke hamamuk ona fatin..
Merkadu ne’e fatin atu faan no sosa, la’ós fatin atu halo fali uma permanente hodi hela ho família, haki’ak animál, tan ne’e presiza husik livre, atu ba oin Estadu harii no hadi’a fali merkadu ne’e didi’ak, atu ema hotu uza ho dignu no servi ba ema hotu atu livre fa’an no sosa sasán.
Notísia relevante:Merkadu Numbei sei konstrui ho verba rihun $76, aterru hahú daudaun ona
Jornalista: Abílio Elo Nini
Editór: Rafael Ximenes de A. Belo
