BOBONARU, 07 Janeiru 2025 (TATOLI)-Autoridade Munisípiu Bobonaru (AMB) inaugura, iha kuarta ne’e, saladeaula neen no entrega ofisialmente ba jerente Eskola Bazíka Sentrál (EBC, sigla portugés) Samutaben, iha suku Manapa, postu administrativu Kailaku, hodi utiliza ba prosesu ensinu aprendizajen.
Prezidente Autoridade Bobonaru, Paulo Moniz Maia, agradese ba empreza Lislap Naroman Unip. Lda. ne’ebé ezekuta obra ne’e tuir tempu no hatudu rezultadu ne’ebé kualidade tuir ema hotu nia hakarak.
Paulo Moniz Maia argumenta katak sala ne’e konstrui atu hakonu povu nia esperansa ba ukun-an iha setor edukasaun nian, nune’e nia husu jerente eskola, manorin, no estudante sira atu kuída instalasaun ne’e.
Notísia relevante: Sala tolu iha EBC Samutaben la dignu ba estudante sira
“Ha’u hakarak loron ida ami sira ne’e mai vizita eskola ne’e moos nafatin hanesan ne’e, labele estraga, uza ho didi’ak, nune’e ita bele uza tinan ba tinan, tanba ne’e ita-nia rikusoin Kailaku ninia, espesialmente suku Manapa”, nia hateten iha serimonia inaugurasaun ne’e.
Diretór Servisu Munisipál Edukasaun Bobonaru, Miguel Freitas, husu mós ba inan-aman no líder komunitária sira atu asegura no kuidadu animál labele movimenta livre iha resintu eskola nian.
“Ha’u mós orienta ona dirijente eskola atu tau redi hale’u eskola, nune’e bele hadi’a eskola laran ne’e, iha jardín no ita bele haree eskola ne’e furak liután”, katak.
Reprezentante inan-aman, Serafina Rica Mali, konsidera obra ne’e bele tulun estudante sira partisipa ensinu no aprendisajen iha fatin dignu no seguru.
“Durante tinan barak ona ami nia-oan sira eskola iha fatin ladún di’ak, plafon sira nakles, kalen mós metan hotu, tempu udan hanesan ne’e ami tau ai ho kalen, maibé agora ita haree eskola ne’e di’ak ona, ami hanesan inan-aman kontente”, nia dehan.
Obra ne’e ezekuta ho orsamentu husi Planu Dezenvolvimentu Integradu Munisipál (PDIM) tinan 2025 hamutuk $162.251,45.
Tuir dadus tinan letivu 2025, EBC Samutaben akumula estudante hamutuk na’in-390 husi primeiru to’o terseiru siklu no profesór na’in-17.
Notísia relevante: Konstrusaun saladeaula neen iha EBC Samutaben besik konklui
Jornalista: Sergio da Cruz
Editora: Maria Auxiliadora
