OEKUSI, 09 Janeiru 2026 (TATOLI) – Falintil-Forsa Defeza Timor-Leste (F-FDTL) liuhosi komponente navál Rejiaun Administrativa Espesial Oekusi Ambeno (RAEOA), sesta ohin, hala’o doasaun raan ho voluntariamente hodi oferese ba Ospitál Referál Oekusi hamutuk 1.250 milimeter (ml) nu’udar parte ida hosi jornada selebrasaun aniversáriu komponente navál ba dala-24 ne’ebé sei akontese iha loron 12 Janeiru 2025.
Xefe Unidade Laboratoriu Ospitál Referál Oekusi, Fernando Pereira Nono, reprezenta Ospitál Referál Oekusi agradese ba Komandu F-FDTL liu-liu komponente navál, tanba atividade doasaun raan ne’e importante ba ospitál, bele fasilita pasiente sira-ne’ebé presiza raan urjentemente.
“Agradese tebes ba F-FDTL sira-nia tulun ida-ne’e. Ami konsidera apoia tebes ospitál, liu-liu ba ita-nia pasiente sira kuandu presiza raan,” nia hateten iha sala laboratóriu Oekusi, ohin.
Ezekutivu ne’e esplika, kritéria ba sidadaun hotu bainhira hala’o doasaun raan, iha tipu tolu, bele oferese 250 mililitru 50 mililitru no bele mós 400 mililitru, “Maibé ohin ita-nia forsa sira oferese 250 militer hosi ema na’in-lima ne’ebé hamutuk 1.250 mil ho tipu raan O+ na’in-tolu no A+ na’in-rua,” nia afirma.
Nia subliña, hafoin halo doasaun, raan ne’ebé oferese ona, ekipa tékniku laboratorium sei asegura iha jelera malirin nian, ho durasaun tempu fulan ida-resin, bainhira pasiénte ruma, presiza tebes apoia raan, ka ho kondisaun grave ona, bele utiliza raan ne’e atu salva nia vida.
Notísia relevante:Tenente Jenerál Falur prefere Governu halo investimentu urjénsia ba Komponente Navál
Entretantu, Jornalista Ajénsia Tatoli,I.P tenta konfirma asuntu ne’e ho Komandante F-FDTL Komponente Navál Oekusi, maibé reseita fó informasaun tanba ierarkiamente komandu mak iha direitu atu fornese informasaun ba mídia.
Maibé tuir informasaun ne’ebé Jornalista Ajénsia Tatoli,I.P asesu, katak daudaun ne’e Komandante F-FDTL Komponente Navál Oekusi, ajenda ona atividade prinsipál haat ba komemorasaun loron aniversáriu komponente Navál nian, mak hanesan fasilita treina orden unida ba estudante Ensinu Sekundáriu Jerál (ESG) Palaban, jogu futeból amizade, doasaun raan no ikus sei misa agradesimentu iha igreja Santo António Oekusi.
Jornalista: Abílio Elo Nini
Editór: Rafael Ximenes de A. Belo
