Embaixadór India Madam Kumar relata dezempenu servisu ba PM Xanana
DILI, 12 Janeiru 2025 (TATOLI)—Emabixadór India ba Timor-Leste, Madam Kumar Ghidiyal, hasoru malu ho Primeiru-Ministru, Kay Rala Xanana Gusmão, hodi relata dezempeñu servisu ne’ebé Embaixadór sesante India halo tiha ona no servisu kontinuasaun ne’ebé implementa iha tinan 2025.
Nia informa, iha reuniaun produtivu tebes ho Primeiru-Ministru, Kay Rala Xanana Gusmão, hodi infórma kona-ba servisu oioin ne’ebé embaixada Índia nian halo tiha ona no halo hela iha tinan 2025.
Tanba ne’e, Embaixada India servisu hamutuk ho Governu Timor-Leste liuhusi MNEK iha área oioin hanesan saúde, teknolojia informasaun, Governu Índia hetan pedidu husi Ministériu Saúde Timor-Leste nian hodi halo fornesementu vásina raiva hamutuk 10.000 iha Novembru nia laran.
“Governu Timor-Leste ajuda tebes no sira apoia ami-nia kandidatura iha Nasaun Unida iha eleisaun ba Organizasaun Internasionál Aviasaun Sivíl, Organizasaun Internasionál Marítima no UNESCO Konsellu Ezekutivu,” Embaixadór ne’e relata ba jornalista sira iha Palásiu Governu, ohin.
Aleinde ne’e, nia hato’o agradesementu ba Primeiru-Ministru tanba apoia sira-nia eventu iha loron Internasionál Yoga nian ne’ebé Vise Primeiru-Ministru Asuntu Sosiál no Abitasaun Komunitária, Mariano Assanami Sabino no Sekretáriu Estadu Arte no Kultura India, Krista Bhaoo mós partisipa, inklui atleta na’in-85, atleta Timor-Leste nian ne’ebé partisipá iha CPLP no sira mós hamutuk durante loron Internasionál Yoga.
“Reuniaun ne’e produtivu tebes no ha’u hato’o pedidu ba Primeiru-Ministru atu apoia ami, atu konsella ami, nune’e ami bele fortalese relasaun entre Índia no Timor-Leste,” nia hateten.
Jornalista : Alexandra da Costa
Editór : Cancio Ximenes
