DILI, 27 Janeiru 2026 (TATOLI)—Governu liuhusi reuniaun Konsellu Ministru, tersa ne’e, aprova rezolusaun fó doasaun ho montante millaun $2 ba Repúblika Mosambike, hafoin akontese inundasaun ne’ebé afeta maka’as hodi rezulta ema mate, dezlokasaun forsada, destruisaun ba uma sira, infraestrutura sosiál sira nomós interrupsaun maka’as iha asesu ba servisu esensiál sira.
Konsellu Ministru foti desizaun ida-ne’e hodi hatán ba pedidu formál ne’ebé aprezenta husi Governu Mosambikanu tanba eskala husi krize umanitáriu ne’ebé la’o daudaun, ne’ebé afeta ema atus ba atus, ho impaktu maka’as liu ba feto no labarik sira.
Apoiu ne’ebé aprova husi Konsellu Ministru ne’e ho intensaun atu kontribui ba resposta umanitária urjente, hametin kapasidade tulun no asisténsia ba populasaun sira-ne’ebé afetadu, nomós hamenus efeitu imediatu husi emerjénsia ne’e, iha koordenasaun ho autoridade mosambikana no esforsu sira husi komunidade internasionál.
Jornalista : Alexandra da Costa
Editór : Cancio Ximenes
