DILI, 04 Fevereiru 2026 (TATOLI)—Governu liuhusi reuniaun Konsellu Ministru, kuarta ne’e, aprova adezaun Timor-Leste nia akordu ba akordu-kuadru Asosiasaun Nasaun Sudeste Áziatiku (ASEAN, sigla portugés) kona-ba izensaun vistu ho durasaun loron 14.
Vise-Ministra Asuntu ASEAN, Milena Rangel, hateten ohin MNEK iha aprezentasaun tolu (3) iha ASEAN nian, proposta dahuluk kona-ba vistu akordu kuadru ida no finaliza hotu ona, nune’e ohin hamosu rezolusaun ida atu lori ba Parlamentu Nasionál hodi ratifika.
“Akordu Kuadru ASEAN kona-ba Izensaun Vistu ne’e, asina iha Kuala Lumpur, Malázia, iha loron 25 fulan-Jullu tinan 2006, estabelese baze hodi fasilita viajen iha rejiaun laran, liuhusi izensaun vistu ba estadia to’o loron 14 ba sidadaun Estadu-Membru sira,” Vise-Ministra ne’e relata iha Palásiu Governu, ohin.
Medida ida-ne’e ho intensaun atu promove mobilidade rejionál, turizmu, interkámbiu umanu no hametin relasaun entre povu sira iha rejiaun ne’e. Akordu ne’e mós prevee katak Estadu-Membru ida-idak bele fó izensaun vistu ba períodu sira-ne’ebé liu loron 14, tuir ninia lejizlasaun nasionál ka akordu bilateál sira, hodi garante fleksibilidade iha definisaun ninia polítika migratória.
Jornalista : Alexandra da Costa
Editór : Cancio Ximenes
