BOBONARU, 14 Fevereiru 2026 (TATOLI)-Kaebauk Investimentu Finansa (KIF) inaugura, ohin, edifísiu ba sukursál foun iha Maliana, munisípiu Bobonaru.
Diretór-Ezekutivu KIF, Ángelo Bere Cau Soares, hateten edifísiu foun ne’e nu’udár forma no testamentu ida husi kompromisu KIF nia atu halo serbisu finanseiru asesivel ba ema hotu.
Ho establesimentu edifísiu foun ne’e, Kaebauk iha papél atu fó nafatin prioridade ba prinsípiu servisu ne’ebé profisionál, konfiavel no responsavel.
“Kaebauk loke nia sukusrál iha Maliana dezde Janeiru 2010. Momentu ne’ebá sei ho naran Tuba Rai Metin. Durante dékada ida-resin, Kaebauk utiliza de’it komunidade nia uma hodi halo atendimentu ba kliente sira, maibé ohin iha ona edifísiu foun boot ida ho espasu luan”, nia hateten iha serimónia inaugurasaun ne’e.
Ministru Komérsiu no Indústria, Filipus Nino Pereira, avalia ezisténsia Kaebauk bele tulun Estadu no Governu hametin ekonomia iha baze.
“Prezensa Kaebauk nian hodi osan hakbesik-an ba povu. Ita espera katak ida-ne’e sei fó vantajen barak liután ba empreza ki’ik sira, hodi tulun sira hasa’e klase ba setór formál. Ha’u espera Kaebauk nia prezensa sei fortifika ezisténsia mikro, pekena no médiu empreza iha Timor-Leste, nune’e aselera dezenvolvimentu ekonomia, espesialmente iha munisípiu Bobonaru”, nia dehan.
Governadór Banku Sentrál Timor-Leste, Helder Lopes, apresia Kaebauk ne’ebé kontinua habelar no hametin nia liras iha territóriu tomak.
“Ha’u lori Banku Sentrál nia naran hato’o parabéns ba imi-nia susesu ida-ne’e. Maski Kaebauk sei hanesan Instituisaun Mikro Finansa, maibé ninia papél hodi apoia ita-nia dezenvolvimentu ekonómiku, liuliu sai intermediáriu hodi finansia atividade ekonómika ne’e boot tebes. Sasukat primeiru sira-nia asset ne’e liu milaun $60, segundu sira fó kreditu liu milaun $45 ba kliente sira iha territóriu, terseiru mak sira-nia kliente liu rihun 22 iha territóriu tomak”, nia informa.
Kaebauk iha ona edifísiu iha Lautein, Oekusi no iha tempu badak sei halo tan inaugurasaun ba sukursál foun iha Baukau no sei konstrui mós sukursál iha Manatutu.
Membru Kaebauk iha sukurál Maliana hamutuk na’in-25 no kliente 2.495.
Notísia relevante: BCTL apoia inisiativa Kaebauk transforma an ba banku
Jornalista: Sergio da Cruz
Editora: Maria Auxiliadora
