MALIANA, 16 Fevereiru 2026 (TATOLI) – Prezidente Autoridade Munisípiu Bobonaru, Paulo Moniz Maia, inaugura sala maternidade no entrega ba Sentru Saúde Komunitária (SSK) Maliana hodi reforsa servisu atendimentu saúde maternu-infantíl ba populasaun sira.
Paulo Moniz Maia esklarese katak Governu konstrui obra ne’e atu reponde ba povu nia espetativa ba ukun-an hodi hetan instalasaun saúde ida ne’ebé digna.
Notísia relevante: SSK Maliana solisita ba empreza Majoma aselera konstrusaun sala maternidade
“Maliana iha suku hitu. Durante ne’e sira atu partu karik hotu-hotu halai bá ospitál, tanba sala maternidade seidauk iha. Ohin, ita inaugura [sala no] entrega nune’e inan isin-rua bele mai partu iha sala ida-ne’e, la’ós de’it husi Maliana, postu seluk mós bele mai atu partu iha ne’e”, nia hateten.
Hodi husu ba médiku, enfermeiru, no parteira sira atu halo atendimentu di’ak ba ema ho moras oioin. “Balun atu partu, balun moras seidauk to’o tempu atu partu, ita simu sira ho liafuan ne’ebé mamar, simu sira ho oin ne’ebé midar”, nia sujere.
Xefe Suku Ritabou, Maximiano dos Santos Araújo, apresia Governu tanba responde ona pedidu líder komunitáriu nian hodi harii uma maternidade ne’ebé planeia ona dezde 2017.
“Uma ne’e ikus mai kompletu ona. Maski nune’e, ami hein katak Governu bele kompleta fasilidade sira, tanba médiku no parteira sira só bele serbisu ho ótimu bainhira ekipamentu sira disponivel” nia hateten.
Diretór Servisu Saúde Muníspiu Bobonaru, Gil Bernardo Vicente, identifika ona ekipamentu no sei enkamiña ba Ministeriu Saúde atu kompleta.
“Ekipamentu sira mai mak ami bele funsiona fasilidade saúde nian. Ba oin sira husi suku Ritabou no Raifun atu partus la presiza ona bá Ospitál Maliana. Karik ida ne’ebé labele partus iha ne’e mak ita transfere bá Ospitál Referénsia”, nia salienta.
Ho inaugurasaun uma maternidade ne’e, Governu lokal hein katak asesu bá servisu saúde inan no infantíl iha Bobonaru sei hasa’e no hamenus risku partu ba inan isin-rua sira iha fatin referidu.
Obra ne’e konstrui husi empreza lokál Mazoma Gomes Unipessoal Lda., liuhusi orsamentu Planu Dezenvolvimentu Integradu Munisipál (PDIM) 2025 ho montante $108.003,29.
Aleinde inaugura sala maternidade, Autoridade Munisípiu Bobonaru mós halo inaugurasaun ba Rezidénsia Pesóal Saúde iha Sentru Saúde Komunitária his postu administrativu Bobonaru no Eskola Bázika Filiál Beamoas, iha suku Kolimau.
Notísia relevante: Infermeiru iha Sentru Saúde Maliana seidauk sufisiente
Jornalista: Sergio da Cruz
Editora: Maria Auxiliadora
