DILI, 16 Fevereiru 2026 (TATOLI)—Eletrisidade Timor-Leste, Empreza Públika (EDTL, E.P), iha 2026 ne’e, sei mellora asesibilidade pilotu dahuluk 2026 ba enerjia eletisidade iha nivel aldeia hamutuk 81 iha territóriu.
Vise-Prezidente Eletrisidade Timor-Leste, Júlio de Jesus Gonçalves, hateten implementasaun asesibilidade enerjia eletrisidade ne’e labele dehan ba alvu munisípiu ida de’it maibé ne’e ba munisípiu hotu-hotu, tanba aldeia ne’ebé seidauk asesu ba eletrisidade ne’e sei barak.
“Tinan ida-ne’e, ita sei finaliza liña eletrifikasaun ba nivel aldeia 186 no daudaun ne’e iha projetu 81 mak sira halo ona konkursu públiku, entaun hein katak tinan ida-ne’e ita bele fó sai ona rezultadu ba pilotu dahuluk, no sei fó oportunidade ba empreza lokál sira mak implementa projetu ida-ne’e. Maibé tinan ne’e sira sei esforsu konklui hotu iha nivel aldeia,” Vise-Prezidente EDTL ne’e informa ba Agência Tatoli iha nia kna’ar fatin, ohin.
Aleinde ne’e, nia hatutan, Konsellu Ministru mós delibera orsamentu transferénsia públika ho montante millaun $1-resin ba EDTL atu implementa programa 186 eletrisidade ho objetivu atu asegura servisu fornesimentu eletrisidade públiku.
“Dalabarak sidadaun sira kestiona kona-ba ahi mate liuliu iha kapitál Dili ne’e, tanba projetu melloramentu liña ne’ebé kauza husi tékniku (ekipamemtu tuan presiza manutensaun), natureza no planu manutensaun (avizu) iha fim de semana sei hamate ahi durante oras rua nia laran,” nia dehan.
Jornalista : Alexandra da Costa
Editór : Cancio Ximenes
