VIKEKE, 19 Fevereiru 2026 (TATOLI)—Autoridade Vessoru, Postu Administrativu Uatulari, Munisípiu Vikeke, entrega ona konstrusaun Postu Saúde Vessoru ba Sevisu Saúde Munisípiu (SSM) Vikeke lori atende komunidade ne’ebé moras.
Iha serimónia entrega postu saúde ne’e, Xefe Suku Vessoru, Paulo Fernandes, hateten obra postu saúde ne’e finansia husi Progama Nasionál Dezenvolvimentu Suku (PNDS).
“Ami-nia postu tuan ne’e iha, maibé kondisaun aat ona. Tan ne’e mak ami tau planu ba iha PNDS 2024 nian, ami halo konstrusaun postu saúde foun. Obra ne’e ami konklui ona. Tan ne’e, ohin ami realiza serimónia ida hodi entrega ofisiál ba SSM Vikeke, atu pesoal saúde sira uza lori aternde komunidade iha Suku Vessoru,” Paulo Fernandes ba jornalista sira iha Suku Vessoru, Kinta ne’e.
Nia esplika, obra konstrusaun postu saúde ba Suku Vessoru gasta orsamentu hamutuk rihun $27, edifísiu ne’e iha sala atendimentu emerjénsia no sala parte rua nian no kompleta ho sanitária.
“Ha’u sente edifísiu foun bele sufisiente ona ba ita-nia pesoál saúde sira uza no sufisiente ona ba ita-nia komunidade asesu. Ita kompara ba postu tuan ne’e kondisaun aat tebetebes. Iha tinan oin (2027) ami sei kontinua tau planu ba morru protesaun atu asegura postu saúde,” nia hato’o.
Iha fatin hanesan, Reprezentante Diretór Servisu Saúde Munisípiu Vikeke, Fernando Soares, hato’o agradesimentu ba autoridade sira husi Suku Vessoru ne’ebé konstrui ona postu saúde ida ba pesoál saúde sira.
“Ami hakarak hato’o agradesimentu ba Ministériu Administrasaun Estatál (MAE) liuhusi programa PNDS ne’ebé autoridade Suku Vessoru prioriza konstrusaun fasilidade saúde. Ida-ne’e ita bele garante mellora ona tratamentu saúde hodi redús taxa moras no mate,” nia subliña.
Fernando informa fasilidade postu saúde foun ne’e sei uza ba konsulta jerál no maternidade hodi konsulta inan isin-rua sira-ne’ebé partu. Iha postu saúde ne’e koloka ona enfermeiru na’in-rua (2) no parte na’in-ida.
Entretatu, iha serimónia ne’e partisipa husi ekipa MAE, Autoridade Munisípiu Vikeke, Autoridade Postu Uatulari, veteranu, PNTL, SSM Vikeke, profisionál saúde no komunidade husi Suku Vessoru.
Jornalista: Vitorino Lopes da Costa
Editór: Xisto Freitas da Piedade
