KOVALIMA, 24 Fevereiru 2026 (TATOLI)- Sentru Lojístika Nasionál (CLN), Munisípiu Kovalima, iha 2025 ne’e, sosa ona hare kulit tonelada 289 husi agrikultór sira, iha munisípiu Kovalima.
“Hahú fulan-Maiu to’o Dezembru 2025 ne’e, ami sosa ona hare kulit tonelada 289 husi komunidade sira”, Pontu Vokál CLN Kovalima,António Amaral relata dadus ne’e ba Tatoli,i.p, iha Bairru Kosta-Suai, ohin.
CLN sira sosa hare kulit husi komunidade liuhusi empreza haat mak hanesan verdade Lorosa’e, Danses, Asosiasaun Wababa no empreza Cabral, hafoin Governu sosa lori ba rai iha armazein CLN Tibar hodi dulas hare kulit ba foos rai.
Tuir dadus Servisu Munisipál kona-ba produsaun hare kulit iha munisípiu Kovalima hamutuk tonelada 3.013, husi dadus ne’e produsaun hare kulit kada ektare atinje tonelada 3,5 husi postu administrativu haat mak hanesan, Zumalai, Suai, Tilomar no Fatumea hamutuk tonelada 3.013.
Notísia relevante: Tinan 2026, CLN prevee millaun $1.500 sosa hare-kulit iha rai-laran
Jornalista: Celestina Teles
Editór:Florencio Miranda Ximenes
