DILI, 19 Marsu 2026 (TATOLI)—Prezidente Bee Timor-Leste, Emperza Públiku (BTL, E.P), Gustavo da Cruz, informa kazu perfurasaun no ligasaun bee ilegál iha iha kapitál Dili daudaun ne’e diminui ona ba 79,9% tanba ekipa tékniku sira sempre halo inspesaun no monitorizasaun.
Prezidente Bee Timor-Leste, Gustavo da Cruz, hateten komunidade hirak ne’ebé kontinua liga ka perfurasaun bee ilegál (saniu) ne’e menus ona 79,9% no ligasaun antigu sira mak sei eziste hela, maibé ekipa tékniku husi BTL nafatin halo intervensaun hodi hakotu ligasaun ilegál no halo melloramentu, entaun kuaze sira-nia atendimentu ne’e iha mudansa signifikante.
“Bazeia ba reseita husi BTL nian ne’ebé kada períodu iha ninia mudansa, entaun kontribuisaun konsumidór sira hahú di’ak tanba loroloron ami kontinua tesi no mellora, hafoin halo sensibilizasaun atu konsumidór sira mai rejistu ligasaun legál ba bee,” Prezidente BTL, E.P ne’e informa ba jornalista sira iha edifísiu BTL Kaikoli, ohin.
Tanba, nia dehan, bainhira komunidade la kumpre no kontinua halo perfurasaun ilegál mak sei hetan sansaun administrativa hahú husi $100 to’o $5.000, depende ba aktu individuál ka koletivu no sansaun kriminaliza ba hatama iha sela laran durante oras 72.
Daudaun ne’e BTL, E.P ninia konsumidór ho totál hamutuk 32.000-resin, ne’ebé kompostu husi Dili 19.000 no iha munisípiu hamutuk 13.000.
Aleinde ne’e, kona-ba fornesimentu bee moos ba kapitál munisípiu tinan ida-ne’e se lae inísiu tinan oin sira sei kontinua mellora implementasaun iha Baukau Villa ho totál benefisiáriu hamutuk 33.000-resin no daudaun ne’e iha hela prosesu aprovizionamentu.
Jornalista : Alexandra da Costa
Editór : Cancio Ximenes
