Investidór EUA-Olanda enkontru ho Xanana diskute investimentu iha setór produtivu

DILI, 07 Abríl 2026 (TATOLI)-Investidór internasionál husi Estadu Unidu Amérika no Olanda, ne’ebé akompania husi Vise Primeiru-Ministru, atuál Ministru Koordenadór Asuntu Ekonómiku, Francisco Kalbuadi Lay, hala’o enkontru ho Primeiru-Ministru, Kay Rala Xanana Gusmão, hodi diskute kona-ba investimentu iha setór produtivu.

Vise Primeiru-Ministru, Ministru Koordenadór Asuntu Ekonómiku, Ministru Turizmu no Ambiente, Francisco Kalbuadi Lay, informa investór na’in-rua ne’e mai husi Olanda no Amérika, nune’e sira-nia intensaun prezensa durante semana ida iha Timor-Leste atu ajuda liuliu haree ba área investimentu.

“Tanba sira na’in-rua mós amigu di’ak ho Prezidente Repúblika, entaun ohin mós iha oportunidade ba hasoru malu ho Primeiru-Ministru, nune’e liuhusi orientasaun Xefe Governu no Xefe Estadu, haruka sira mai hasoru mós ha’u tanba ida-ne’e sei diskute kona-ba asuntu ekonómika no hasa’e kapasidade rekursu umanu (edukasaun),” Vise Primeiru-Ministru ne’e relata ba jornalista sira iha nia kna’ar fatin, Faról, ohin.

Aleinde ne’e, nia dehan, sira mós diskute ona iha tempu badak atu harii forum business entre Timor-Leste ho Amérika no seluk tan mak ko’alia kona-ba invairoment climate change.

Konsellériu Investimentu Estratéjiku ba Prezidente Repúblika nian, Peter Thompson, hateten reuniaun ne’ebé produtivu tebes no, klaru, tanba sira mai iha intensaun iha Timor-Leste, nune’e sira hasoru malu uluk ho Xefe Estadu no Xefe Governu hodi fó rekoñesimentu liuliu oinsá atu diskute kona-ba setór ekonomia ba faze dezenvolvimentu nian.

“Oinsá povu Timor-Leste nian bele sai parte husi era foun iha susesu ekonómiku hamutuk ho parseiru sira iha Estadu Unidu, iha Europa no fatin seluk,” nia dehan.

Nune’e mós, nia dehan, ho diskusaun sira-ne’e Miniatru Koordenadór Asuntu Ekonómiku iha interese boot ba komunidade investidór sira iha Estadu Unidu, Europa no organizasaun misaun komérsiu ba Timor-Leste iha nivel aas.

“Tanba ne’e, klaru katak ami sei servisu hamutuk ba asuntu sira-ne’e, nune’e ami hakarak atu hato’o agradesimentu ba Vise Primeiru-Ministru, nia atendimentu ospitalidade ne’ebé di’ak, tanba iha vizaun boot ida ba futuru ekonomia Timor-Leste nian no inspirativu tebes atu rona,”  nia dehan.

Jornalista : Alexandra da Costa

Editór        : Cancio Ximenes