OEKUSI, 16 Abríl 2026 (TATOLI) –Iha trimestre dahuluk husi Janeiru mai to’o Marsu 2026 ne’e, Ospitál Referál Oekusi rejista kazu diabétika tolu no hipertensaun ualu, Administradora Ospitál Referál Rejiaun Administrativa Espesiál Oekusi Ambeno, Odete Amado Martins, relata.
“Husi Janeiru mai to’o Marsu ne’e, ita rejista moras diabétika tolu no moras hipertensaun ualu, no laiha rejista mate kauza husi moras rua ne’e, iha maibé sofre moras komplikasaun inklui mós ho moras diabétika no hipertensaun,” nia hateten ba jornalista sira iha Ospitál Referál Oekusi, ohin.
Tanba ne’e, atu prevene moras rua ne’e, nia apela, presiza prevene konsumu ai-han ne’ebé midar inklui ai-han kímiku, tanba kauza prinsipál husi moras diabétika mai husi ai-han.
Notísia relevante:Espesialista Endocrimolojia husu pasiente diabetes mantein halo tratamentu
Médika ne’e esplika, atu deteta moras hirak-ne’e, liuhusi raan, bainhira halo ezame ba raan, nia glukoza aas, pozitivamente afeta moras diabétika, no fatór sira-ne’ebé halo ema sofre moras diabétika, tanba konsumu ai-han sira-ne’ebé midar, ladun halo ezersísiu, inklui mós konsumu hahán kímiku sira.
“Moras hipertensaun ho diabétika ne’e iha relasaun ho raan, kuandu ema ne’ebé sofre ona moras diabétika, nia risku mós ba iha hipertensaun, tanba moras rua ne’e nia relasaun direita ho ita-nia raan,” nia hateten.
Nia informa, iha Ospitál iha medikamentu atu halo tratamentu, maibé importante tenke hakbesik ba fasilidade saúde hodi konfirma raan, nune’e halo diágnostiku ba ezame laboratóriu maka foin bele hatene nia rezultadu kona-ba moras rua ne’e.
Notísia relevante:Moras tensaun, diabetes no estroke mai husi hahán no bebida
João Bata, nu’udar pasiente hipertensaun daudaun ne’e hala’o hela tratamentu iha Ospitál Referál Oekusi, konfirma, saúde presiza kontrola, nune’e bele prevene an husi moras.
“Moras ne’e ha’u afeta ona. dala-barak ema ko’alia katak, ita hotu nia saúde ne’e iha idak-idak nia liman rasik, maibé durante ne’e ha’u organiza sala ha’u-nia isin-lolon mak ha’u sai nune’e, maibé agradese nafatin ba profisionál saúde sira, tanba atende ita ho di’ak no kapaas tebes, agora ha’u sente di’ak uitoan, tanba kona primeiru ha’u tama iha haris-fatin, derepente monu iha haris-fatin, ha’u la sadar (konsiente) ona, maibé agradese ba ha’u-nia kolega tanba konsege lori ha’u lalais mai ospitál,” nia haktuir.
Notísia relevante:Moras diabetes afeta ema mate millaun 1.5
Jornalista: Abílio Elo Nini
Editór: Rafael Ximenes de A. Belo
