KOVALIMA, 18 Maiu 2026 (TATOLI)- Autoridade Munisípiu Kovalima hala’o enkontru extraordináriu ho Konsellu Konsultivu Munisipál (KKM) hodi halo apresiasaun ba Planu Asaun Anuál 2027.
“Iha prosesu diskusaun hodi diskute no halo apresisaun lista projetu PDIMP no prosesu ba lista projetu PDIM husi Aldeia to’o mai iha munisípiu no implementasaun projetu PNDS ne’ebé identifika iha aldeia no suku hodi tau iha PAA ida ne’e mak ita lao hela no halo apresiasaun PAA 2027”,Prezidente Autoridade Munisípiu Kovalima, Miguel Armada Cardoso hato’o iha salaun AMC hafoin lidera enkontru KKM iha salaun AMC.
Iha PAA 2027 Autoridade Kovalima iha nia programa 21 ,sub programa 60 , atividade 113 ne’ebé hetan ona aprovasaun husi membru KKM nune’e autoridade Kovalima kontinua hato’o ba ba MAE.
Autoridade Kovalima ne’e dehan, bainhira mak atu lori ba nasionál depende kalendáriu ne’ebé iha. Autoridade Kovalima propoin orsamentu OJE 2027 $22,479.720 95, fahe ba kategória salariu vensimentu $3.026.568.5, bens no servisu no korrente $2.892.168, tranferensia Públiku $ 4,745,878,kapital Menór $ 1.617.060 no kapitál Dezenvolmentu $ 10.198.046.45.
Iha fatin hanesan, Xefe Suku Fohorem, Julio Alves apresia tanba liuhusi KKM halo votasaun no halo apresiasaun ba PAA 2027 molok atu lori ba nasionál
“ Ha’u apresia tanba molok atu lori ba nasionál sei halo diskusaun no halo aprovasaun liuhusi enkontru KKM hodi halo votasaun ho nia rezultadu aprovasaun ho unanimidade”. Nia apresia.
Jornalista:Celestina Teles
Editór: Florencio Miranda Ximenes
