DILI, 22 Jullu 2026 (TATOLI)—Governu liuhusi desizaun Konsellu Ministru aprova proposta ne’ebé aprezenta husi Vise-Ministra Negósiu Estranjeirus no Kooperasaun, Jesuína Maria Ferreira Gomes, kona-ba akordu entre Repúblika Demokrátika Timor-Leste no Repúblika Vanuatu kona-ba Izensaun Vistu ba Titulár Pasaporte Diplomátiku no Servisu.
Akordu ida-ne’e ho intensaun atu aprofunda relasaun ne’ebé iha ona no fasilita vizita ofisiál sira entre nasaun rua ne’e, liuhusi rekoñesimentu resíproku ba pasaporte diplomátiku no ofisiál ka servisu nian, no mós fó izensaun ba vistu ba nia titulár sira ba entrada no estadia iha ida-idak nia territóriu.
Aleinde ne’e, Konsellu Ministru mós delibera hodi aprova akordu entre Repúblika Demokrátika Timor-Leste no Repúblika Vanuatu kona-ba programa kooperasaun téknika ba dezenvolvimentu.
Akordu nia objetivu prinsipál sira mak atu promove kooperasaun dezenvolvimentu nian iha área estratéjiku oioin, hametin dame, estabilidade no seguransa liuhosi promosaun valór komún sira, no mós kria mekanizmu kooperasaun tékniku sira ne’ebé fó benefísiu ba malu entre Estadu rua ne’e.
Ho akordu ida-ne’e, Repúblika Demokrátika Timor-Leste no Repúblika Vanuatu reafirma sira-nia kompromisu atu aprofunda kooperasaun bilaterál, hodi hametin parseria entre Estadu illa Pasífiku rua ne’ebé hasoru dezafiu hamutuk no iha objetivu ne’ebé hanesan atu promove dezenvolvimentu sustentável, prosperidade no estabilidade rejionál.
Jornalista : Alexandra da Costa
Editór : Cancio Ximenes
