Produsaun hare iha Bobonaru atinje média tonelada 3,8 kada ektare iha époka dahuluk
BOBONARU, 10 Agostu 2026 (TATOLI) – Autoridade Munisípiu Bobonaru, liuhusi Servisu Munisipál Agrikultura rejista katak produsaun hare époka dahuluk tinan 2026 atinje média tonelada 3,8 kada ektare, bazeia ba rezultadu estimativa husi área kultivu iha postu administrativu neen iha munisípiu referidu.
Diretór Servisu Munisipál Agrikultura, Autoridade Munisípiu Bobonaru, Longuinhos João, dehan katak produtividade hare iha tinan ida-ne’e laiha diferensa boot kompara ho tinan sira uluk, maski rezultadu iha postu administrativu balun aas liu postu seluk.
“Ami bele hatete katak produtividade tinan ida-ne’e ho tinan sira seluk kauze hanesan deit. Bainhira ami akumula rezultadu husi postu administrativu neen iha Bobonaru, produtividade média iha nivel munisipál atinje tonelada 3,8 kada ektare”, Longuinhos dehan ba jornalista sira, ohin.
Nia esplika katak, maski natar-na’in iha postu administrativu balun aprezenta estimativa produsaun liu tonelada 5 kada ektare, maibé tanba rezultadu husi postu seluk menus liu, médiu jerál munisípiu fixa iha tonelada 3,8 kada ektare.
Tuir nia, kalkulasaun ne’e bazeia ba área kultivu liu ektare rihun 3, ne’ebé espalla iha postu administrativu hotu-hotu iha munisípiu Bobonaru.
Autoridade munisipál hein katak produsaun hare bele aumenta tan iha futuru, liuhusi melloramentu iha sistema kultivu, uza teknolojia agrikultura no apoiu kontinua ba agrikultór sira atu hasa’e produsaun no kontribui ba seguransa ai-han iha munisípiu ne’e.
“Ita-nia konseitu ne’e kan la’ós de’it oinsá atu hetan osan, maibé oinsá agrikultór sira bele iha ai-han natoon, kualidade no sustentavel. Ai-han ne’e labele kotu, ida-ne’e mak ita rezolve uluk lai. Kuandu barak liu konserteza sira tenke fa’an balun para hetan osan hodi sustenta sira-nia nesesidade ou bele halo atividade produtivu sira seluk iha tempu sira tuirmai”, nia dehan.
Natar-na’in iha suku Odomau, Fernando Soares, dehan rezultadu produsaun hare iha área Rabas tinan ne’e diferente ho tinan kotuk, tanba udan-been di’ak no livre husi atake peste karakól.
“Ha’u-nia ektare ida hetan karon-mutin boot ne’e 90. Tinan liubá ne’e lato’o ida, hetan de’it karon 50 liu”, nia realsa.
Daudaun ne’e, natar-na’in sira iha parte Helekou, Atabae no balun iha Kailaku prepara hela kultivu hare époka daruak tinan 2026, enkuantu Maliana suspende tanba Governu prepara hela atu halo reabilitasaun ba Irrigasaun Maliana I.
Notísia relevante: Bobonaru rejista rezultadu di’ak iha produsaun hare iha époka 2025
Jornalista: Sergio da Cruz
Editora: Maria Auxiliadora
