Falta profesór, EBF Bobomanat Oésilo mós iha difikuldade ba mobiliáriu eskolár

OEKUSI, 25 Agostu 2026 (TATOLI) – Falta profesór, Eskola Bázika Filiál (EBF) 1,2,3 Nove Setembru Bobomanat Oésilo mós iha difikuldade ba mobiliáriu eskolár sira hodi asegura efetividade atividade letiva iha estabelesimentu ensinu referidu.

Nune’e, Koordenadór eskola Jacinto Soni,  rekomenda ba Autoridade Rejiaun Administrativa Espesiál Oekusi Ambeno (RAEOA), liuhusi servisu rejionál edukasaun, atu fornese mobiliáriu eskolár sira hanesan meja no kadeira.

Dirijente eskola ne’e, informa, mobiliáriu ne’ebé sira utiliza antigu nian, ne’ebé Governu fornese iha tinan-10 liubá, no oras ne’e barak mak aat, nune’e presiza fornese atu fasilita estudante sira hodi partisipa prosesu aprendizajen ho dignu.

“Ami nia bee-moos sufisiente maske loron rua tolu sai dala ida, maibé difikulta ami iha prosesu aprendizajén maka mobiliáriu; meja no kadeira mak sei falta, tanba mobiliáriu hirak ne’e ami utiliza tinan barak ona, uluk kedas kala tinan 10-resin ona; sasán uluk nian. Agora kondisaun aat ona, ita tuur ladi’ak hanesan mós ho meja, kondisaun aat ona,” nia hateten ba jornalista sira iha Oekusi, ohin.

Kona-ba kadeira no meja ne’ebé aat, nia dehan, parte eskola ho inisiativa hodi hola pregu hadi’a iha tempu extra nian, nune’e bele utiliza ba estudante sira.

“Ami aproveita iha loron sábadu kada semana, ami hola pregu hadi’a hamutuk ho estudante sira, maibé barak mak aat kondisaun ladi’ak ona, maske ita tuur nakdoko hela mós tenke uza iha sala-laran, atu evita labarik sira tuur iha simentu hodi partisipa prosesu aprendizajén, ne’ebé sala rua mak enfrenta menus kadeira no meja, ita espera parte edukasaun bele apoia, tanba sasán hirak-ne’e tuan liu ona,” nia rekomenda.

Notísia relevante:EBF Bobomanat iha Oésilo falta profesór atu hanorin disiplina fízika

Hatan ba preokupasaun ne’e, Diretór Servisu Rejionál Edukasaun Oekusi, Vincêncio Cono, hateten, kona-ba fornesimentu mobiliáriu ba eskola sira iha Oekusi, daudaun ne’e iha ona prosesu aprovizionamentu.

“Dadaun ne’e iha hela faze aprosimasaun ba parte aprovizionamentu tanba ita prevee ona orsamentu maibé depende ba estrutura servisu edukasaun rejionál ninian, tanba dadaun ne’e Diretór Edukasaun mesak de’it maka esforsa an iha servisu tomak, tanba xefe departementu sira seidauk hetan nomeasaun tanba antes ne’e xefe departementu sira maka tulun hela servisu hodi la’o maka’as tebes,” nia hateten.

Entretantu, totál estudante daudaun hala’o hela estudu iha EBF 1,2,3 Nove Setembru hamutuk na’in-447 ho totál profesór na’in-13.

Notísia relevante: Konstrusaun EBF Bobomanat iha Oésilo hatudu daudaun mudansa signifikativa

Jornalista: Abílio Elo Nini

Editór: Rafael Ximenes de A. Belo