Padre Pároku Zumalai husu sarani hametin fiar durante vizita São João Paulo II
KOVALIMA, 03 Setembru 2026 (TATOLI) — Padre Pároku Nossa Senhora Do Carmo Zumalai (NOSCAR), Munisípiu Kovalima, husu ba sarani sira atu hametin fiar no aumenta partisipasaun iha atividade Igreja nian durante períodu vizita imajen São João Paulo II iha Parókia Ave Maria Zumalai.
Vizita ne’e sei hala’o iha Parókia Ave Maria Zumalai durante fulan ida ho balun, ne’ebé hahu hosi 13 Novembru to’o 22 Dezembru 2026.
Padre Vigáriu Parókia Nossa Senhora Do Carmo Zumalai, Amândio Soares Salsinha, hatete katak preparasaun ba vizita ne’e presiza koordenasaun di’ak ho komunidade no matan-do’ok eskola sira-nian, liuliu kona-ba oráriu misa, kanta/hananu no partisipasaun sarani sira-nian.
Oráriu misa no koordenasaun ho eskola sira
Nia hateten, padre na’in-tolu ne’ebé servisu iha parókia sei fahe malu tuir oráriu atu selebra misa durante períodu vizita, tanba presiza adapta oráriu misa nian ho programa ne’ebé Edukasaun prepara.
“Hosi parte parokia, ita nia hanoin mak oinsá ita adapta ho oráriu ne’ebé mai hosi Edukasaun, atu nune’e ita bele haree parte misa nian iha ne’e. Iha padre na’in-tolu, sira sei fahe malu tuir oráriu, hodi bele selebra misa iha momentu ne’ebé Illas vizita” , Padre Vigáriu Parokia Ave Maria Zumalai, Amandiu Soares hato’o ba jornalista sira iha Zumalai.
Nia mós husu ba eskola sira atu koordena oráriu misa nian ho antecedénsia liuhosi katekista, xefe aldeia ka komisaun eskola, atu evita difikuldade bainhira padre presiza ba Díli ka iha atividade seluk.
“Ba eskola ne’ebé presiza misa, oráriu tenke haruka antes liuhosi katekista, ka liuhosi xefe aldeia, ka liuhosi komisaun kada eskola. Se mai derepente padre na’in-rua ba Díli, sé mak sei taka? Ami bele taka malu. Importante mak komunikasaun no kolaborasaun,” nia hatutan.
Preparasaun hananu no liturjia
Padre Amandiu mós subliña katak preparasaun ba hananu sai parte importante iha preparasaun eskola sira-nian. Kanta no hananu sira bele uza lian Tetun, Portugés ka Latin, tuir kapasidade no preparasaun kada eskola.
“Iha parte seluk, kada eskola ida-idak prepara nia hananu sira. Bele Tetun, bele Portugés, bele Latin; importante mak prepara ho di’ak. Durante misa loron-ba-loron, Gloria la iha, maibé se monu iha Domingu, tenke kanta hananu kompletu,” nia informa.
Kona-ba festa santu ne’ebé monu iha loron Domingu, Padre Amandio sujere atu misa Domingu hala’o tuir liturjia Domingu nian, enkuantu venerasaun ba santu bele hala’o iha kalan. Misa festa nian bele hala’o iha segunda-feira dadeer, no depois lori imajen santu ba fatin-fatin.
“Atu sujere de’it, se santu ne’e monu iha Domingu, labele misa tanba loron Domingu boot liu santu sira hotu. Entaun, iha Domingu dadeer ita halo misa iha ne’e hotu. Ita ba simu, lori mai no rai de’it. Iha kalan ita halo venerasaun, no Segunda-Feira dadeer ita halo misa, depois lori sai ba fatin-fatin,” nia esplika.
Vizita imajen São João Paulo II ne’e sei sai oportunidade importante ba sarani Parókia Ave Maria Zumalai atu hametin fiar, unidade no partisipasaun komunidade nian iha moris Igreja.
Jornalista: Celestina Teles
Editor: Rafael Ximenes de A. Belo
