Proteje no konserva área kosteira, MAFFP hala’o konsultasaun públika iha Oekusi
OEKUSI, 29 setembru 2026 (TATOLI) – Ministériu Agrikultura Pekuária, Peska no Floresta (MAPPF), liuhusi Sekretáriu Estadu Floresta, hala’o konsultasaun públika iha Rejiaun Administrativa Espesiál Oekusi Ambeno (RAEOA), hodi proteje no konserva rekursu natutál sira iha área kosteira liliu biodiversidade flora no fauna.
Sekretáriu Estadu Floresta, Fernandino Vieira da Costa, informa, kada tinan área kosteira sira, hetan ameasa husi agrikultór sira, nune’e presiza hasa’e konsiensializasaun ba suku sira, hodi kontribui atu proteje no konserva nu’udar rekursu naturál.
“Objetivu husi sosializasaun ne’e, atu halo konservasaun no protesaun ba flora no fauna iha área kosteira, tanba dekreta ona iha lei sira, katak ita iha biodiversidade, flora no fauna, kada tinan hetan ameasa husi agrikultór sira rasik, tanba ne’e sensibilizasaun ne’e hodi fahe informasaun ba komunidade, liliu autoridade lokál sira, hodi transmite fila-fali ba komunidade sira-ne’ebé hela iha Pante Makasar, nune’e sira hothotu nafatin iha responsabilidade konserva no proteze ita-nia biodiversidade flora no fauna,” nia hateten iha sede suku Costa, ohin.
Nune’e bele asegura rekursu floresta sira-ne’ebé iha, tanba Oekusi mós iha rekursu natutál hanesan rai, tanba dalaruma atetude hahalok husi komunidade sira hetan destroisaun maka’as.
“Flora no fauna hanesan rekursu naturál nu’udar kriatura Maromak nian, ita hotu tenke iha responsabilidade proteje, nune’e bele fó sustentabilidade ba pilár ekonomia direita no indireita ba komunidade rasik no mós ba nasaun,” nia esplika.
Notísia relevante:SEA husu públiku tenke kuidadu rikusoin flora no fauna iha Timor-Leste
Iha biban ne’e, Prezidente Autoridade RAEOA, Régio da Crus Salu, konsidera sensibilizasaun presiza habelár ba autoridade komunitária sira, nune’e bele aplika tara-bandu hodi kontribui ba protesaun biodiversidade sira.
“Ha’u apoia tebes, katak ekipa floresta sira tenke atuasaun, tanba regra mak haruka tenke hala’o politíka protesaun no konservasaun biodiversidade tanba ne’e, xefe suku sira presiza ita nia povu hateten, bainhira iha aktu ruma ne’ebé la proteje la konserva rekursu biodiversidade, ita nian politika nia orden ba serbisu setorais ida ne’e sei ba atu halo komfirmasaun no ikus tenki halo atuasaun ida ne’e liga ba kontra bandu, ha’u espera ohin xefe suku balu partisipa, hahú ohin oin tenki diskute ona, atu aplika tara-bandu iha suku idak-idak,” nia hateten.
Notísia relevante:SEA planu reforsa programa tara-bandu hodi proteje flora no fauna
Jornalista: Abílio Elo Nini
Editór: Rafael Ximenes de A. Belo
