MJDAK halo koordenasaun ho entidade relevante ba realizasaun Festivál Nasionál Desportu

DILI, 06 Outubru 2026 (TATOLI)–Ministériu Juventude, Desportu, Arte no Kultura (MJDAK) hamutuk ho Prezidente Autoridade (PAM) Dili, Konfederasaun Desportiva Timor-Leste (CDTL) no Komité Paralímpiku Timor-Leste (CPNTL), Tersa ne’e, realiza enkontru koordenasaun hodi simu Festivál Nasionál Desportu no Festivál Nasionál Desportu Paralímpiku iha Dili.

“Festivál ne’e la’ós de’it kompetisaun maibé espasu atu deskobre talentu foun no promove inkluzaun liuhusi desportu,” Ministru Juventude, Desportu, Arte no Kultura, Nelyo Isaac Sarmento hateten durante enkontru iha Salaun Magna, MJDAK, Lesidere.

Objetivu prinsipál husi atividade ne’e mak halo koordenasaun téknika entre parte interresada hodi garante preparasaun atleta inkluzivu tuir oráriu, fasilita fatin, seguransa no infraestrutura públika iha kapitál Dili, inklui asegura partisipasaun atleta ho defisiénsia.

Notísia relevante : MJDAK apoiu rihun $36 realiza Festivál Nasionál Desportu Paralímpiku

Enkontru ne’e taka ho kompromisu atu kontinua enkontru tékniku períodikamente to’o loron abertura ofisiál ba festivál rua ne’e.

Festivál Nasionál Desportu 2026 sei hala’o iha Novembru 2026 iha Dili durante semana ida nia laran hodi envolve atleta sira husi munisípiu hotu, ne’ebé sei organiza husi MJDAK lideradu husi Ministru Nelyo Isaac Sarmento.

Atividade ne’e realiza hodi hadi’a moris saudável nasionál, aumenta envolvimentu sosiedade, no profisionaliza desportu iha Timor-Leste.

Atleta no reprezentante sira husi munisípiu hotu inklui Rejiaun Autónoma Oekusi Ambeno (RAEOA) no Ataúro.

Munisípiu sira hanesan Baukau no Lautein halo ona enkontru preparatóriu hodi prepara modalidade desportu oioin (modalidade 10-resin) atu ba kompete iha Dili.

Setór privadu no autoridade munisipál sira mós koordena malu ona hodi apoia partisipasaun atleta lokál sira.

Jornalista     : Hortêncio Sanchez

Editora          : Julia Chatarina