PPN simu delegasaun Ministru Justisa CPLP hodi ko’alia kona-ba fraude online
DILI, 26 Outubru 2026 (TATOLI)-Prezidente Parlamentu Nasionál (PPN), Maria Fernanda Lay, segunda-feira ne’e, hala’o sorumutu ho reprezentante xefe delegasaun Ministru Justisa husi Estadu membru sira husi Komunidade País Ko’alia Liia-Portugés (CPLP).
Ministru Justisa, Sérgio Hornai, hatete objetivu husi sorumutu ne’e mak atu rona mós hanoin husi líder órgaun soberania daruak kona-ba konferénsia CPLP ne’ebé Ministru Justisa Timor-Leste rasik prezide, ho tema “Kombate Fraude Online ka Scamming”.
Tema ida ne’e sai preokupasaun sentrál husi Estadu-membru CPLP iha setór justisa no mós iha mundu. Tanba ne’e, importante tebes atu konsolida hanoin no fahe prátika di’ak sira kona-ba lejizlasaun hanesan protesaun dadus, Lei Sibernétika no Seguransa Sibernétika, inklui rona mós hanoin kona-ba efikásia kombate fraude ida-ne’e husi país membru seluk.
Maria Fernanda Lay haato’o nia mensajen kona-ba tema refere liga ho Intelijénsia Artifisiál (IA) ne’ebé daudaun sai preokupasaun órgaun Estadu sira no mós iha mundu, no presiza tebes atu fahe ideia ba malu kona-ba oinsá bele kombate fraude online ne’ebé afeta setór hothotu.
“Importante tebes atu fahe informasaun hotu husi Estadu-membru sira kona-ba oinsá bele kontribui ba ita-nia serbisu tuir kontestu país membru idaidak nian”, nia hatete.
Governante ne’e dehan Timor-Leste maski nasaun foun entre nasaun CPLP seluk, bele fahe mós prátika di’ak ne’ebé iha, embora seidauk iha lejizlasaun kona-ba protesaun dadus no seguransa sibernétika.
Nia dezeja susesu ba konferénsia refere no fó prenda ba reprezentante xefe delegasaun sira nu’udar símbolu amizade metin Timor-Leste ho Estadu-membru sira.
Sorumutu ne’e partisipa mós husi Ministra Justisa no Direitu Umanu Saun Tomé no Prínsipe, Vera Cravid; Diretora-Jerál Polítika no Justisa, ne’ebé reprezenta Ministru Justisa Kabu Verde, Filomena Amador; no Embaixadór Angola nian iha Timor-Leste, José Andrade de Lemos, ne’ebé reprezenta Angola.
Notísia relevante: Xefe Estadu simu delegasaun Ministru Justisa CPLP
Jornalista: Nelson de Sousa
Editora: Maria Auxiliadora
