Top

Eleitór rihun 28 iha Kovalima seidauk halo resensiamentu eleitorál

Diretór STAE Munisípiu Kovalima,João Tilman. Foto TATOLI/Celestina Teles.

KOVALIMA, 16 Novembru 2026 (TATOLI) – Sekretariadu Tékniku Administrasaun Eleitorál (STAE) Munisípiu Kovalima , rejista katak eleitór na’in-28,680 iha munisípiu ne’e seidauk halo Resensiamentu Eleitorál Apoiu ba Baze-dadus (REABD), nu’udar parte husi esforsu atu atualiza dadus eleitorál sidadaun sira.

“Ami halo ona kolokasaun téknika STAE iha kada postu administrativu, ho alokasaun pesoál na’in-tolu, ne’ebé kompostu husi pontu vokál, operadór sistema no asistente operadór atu atende eleitór sira ne’ebé hakarak rejistu ka atualiza sira-nia dadus eleitorál,” iretór STAE Munisípiu Kovalima, João Tilman, relata ba Jornalista sira.

Bazeia ba dadus  STAE nian total eleitór ne’ebé rejistu ona iha postu administrativu hitu hamutuk na’in-54,558. Husi númeru ne’e, eleitór na’in-3,199 mak rejistu foun, enkuantu eleitór na’in-22,789 mak atualiza ona sira-nia dadus eleitorál.

Eleitór na’in-51,997 mak tama ona iha rejistu eleitorál antes ne’e. Maibé, to’o agora, eleitór na’in-28,680 seidauk halo atualizasaun ba sira-nia dadus eleitorál.

Tanba ne’e, STAE Munisípiu Kovalima prepara ona planu atu aumenta atendimentu liuhusi kolokasaun tékniku sira iha nivel suku, hodi fasilita sidadaun sira atu rejistu no atualiza sira-nia dadus eleitorál sem presiza ba diretamente iha sede postu administrativu.

“Prosesu atendimentu iha postu administrativu depende de’it ba sidadaun sira, tanba dala ruma iha loron ida atende eleitór na’in-20, maibé dala ruma la iha sidadaun ida mak mai. Nune’e, ami iha planu atu tun ba suku sira, tanba eleitór na’in-28,680 seidauk atualiza sira-nia dadus eleitorál,” nia dehan.

Nia mós husu komunidade sira atu aproveita oportunidade atendimentu ne’ebé STAE disponibiliza, hodi halo atualizasaun ba sira-nia dadus eleitorál atu garante informasaun eleitorál ne’ebé loos no atualizadu.

Antes ne’e, iha loron 7 Outubru 2026, Sekretáriu Estadu Dezenvolvimentu Lokál (SEDL), Mateus dos Santos Talo, hamutuk ho Autoridade Munisípiu Kovalima, hala’o lansamentu atividade Resensiamentu Eleitorál Apoiu ba Baze-dadus (REABD) iha Postu Administrativu Tilomar.

Atividade ne’e iha objetivu atu hakbesik servisu resensiamentu eleitorál ba komunidade, hodi fasilita sidadaun sira atu rejistu no atualiza sira-nia dadus eleitorál.

Jornalista: Celestina Teles

Editór: Florencio Miranda Ximenes

Publisidade

Leave a Reply

Latest Post

error: Content is protected !!