DILI, 08 abríl 2022 (TATOLI)—Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, husu ba eleitór sira-ne’ebé rejistu no vota ona iha sentru votasaun paralelu labele ba vota fali iha munisípiu, iha eleisaun prezidensiál segunda volta ne’e.
Notísia Relevante: Sentru votasaun paralelu estabelese de’it iha Dili
“Ita husu ba eleitór sira-ne’ebé rejistu ona iha sentru votasaun paralelu nian atu labele vota fali iha ita-boot nia moris fatin, tanba ita-nia naran tama ona iha lista sentru votasaun paralelu nian. Karik ita-boot sira mak ba fatin orijin ita sei la vota tanba naran ita dezativa tiha ona hosi sistema,” Acilino Manuel Branco hateten ba Agência TATOLI, via telefónika, ohin.
Ho nune’e, nia husu nafatin ba eleitór hotu-hotu atu vota iha ida-idak nia suku no husu ba eleitór sira-ne’ebé vota ona iha sentru votasaun paralelu iha primeira volta, tenke nafatin vota iha sentru votasaun paralelu nian no labele ba fali ninia moris fatin tanba naran resensia ona iha sistema.
Bainhira naran rejista ona mak eleitór sira hakarak ba fali vota iha sira-nia munisípiu, mak sira sei ezerse sira-nia direitu vota tanba naran la sai iha sistema STAE nian iha munisípiu sira.
“STAE nia pozisaun la’o tuir saida mak lei hateten iha regra sira. Entaun, ita mós sei aplika situasaun hanesan karik akontese mós iha segunda volta ne’e,” nia dehan.
Iha lei no regulamentu sira mós hateten katak sira-ne’ebé mak ezerse sira-nia direitu votu iha segunda volta ne’e ba eleitór ne’ebé vota iha eleisaun primeira volta nian, nune’e STAE sei la halo atendimentu foun ba eleitór sira-ne’ebé hakarak rejista foun hodi vota iha sentru votasaun paralelu iha Dili.
Notísia Relevante: Governu prepara kamioneta 100 transporta eleitór sira vota iha munisípiu
Jornalista : Osória Marques
Editór : Cancio Ximenes
