22 jullu: reprezentante espesiál ba resensiamentu eleitorál sei dezloka ba Guiné-Bissau

DILI, 20 jullu 2022 (TATOLI)—Ekipa Reprezentante Espesiál ba Prosesu Resensiamentu Eleitorál Guiné-Bissau ne’ebé lideradu hosi Vise-Ministru Administrasaun Estatal (MAE), Lino de Jesus Torrezão, sei dezloka ba Guine Bisau iha 22 jullu 2022.
“Sesta (22/7) bainrua, ita sei dezloka ba Guiné-Bissau hodi halo levantamentu rápidu hodi hatene nesesidade tékniku ba apoiu resesensiamentu eleitorál iha Guiné-Bissau,” Lino de Jesus Torrezão hateten liuhosi telefónika, kuarta ne’e.
Vise MAE dehan husi levantamentu ne’e mak sei kontinua ho apoiu ba realizaun resensiamentu eleitorál ba eleisaun parlamentar Guiné Bissau iha dezembru 2022.
Ekipa ne’ebé atu desloka ba Guiné-Bissau mak Diretór Jerál Sekretariadu Tékniku Administrasaun Eleitorál (STAE), Acilino Manuel Branco, Diretora IT STAE, ho asesór no asesora na’in rua (2).
Antes ne’e, iha 13 jullu 2022, Governu liuhosi reuniaun Konsellu Ministru (KM) aprova projetu rezolusaun Governu, ne’ebé aprezenta hosi Ministru Administrasaun Estatál, Miguel Pereira de Carvalho, kona-ba misaun apoiu ba prosesu resensiamentu eleitorál iha Guiné-Bisau ba tinan 2022.
Rezolusaun Governu ne’e aprova hodi nomea Vise-Ministru Administrasaun Estatál, Lino de Jesus Torrezão, hanesan reprezentante espesiál Governu Timor-Leste nian hamutuk ho Governu Guiné-Bisau hodi halo prosesu identifikasaun ba nesesidade hosi Estadu ida-ne’e ba realizasaun eleisaun livre no justu iha loron 18 dezembru 2022 oin mai.
Reprezentante Governu Timor-Leste ne’e ninia misaun prinsipál mak atu haree resensiamentu no eleisaun parlamentár, ne’ebé misaun hanesan iha tinan hirak liubá mós Timor-Leste hala’o tihsa ona.
Notísia Relevante: Vise-MAE nomeadu sai reprezentante espesiál ba prosesu resensiamentu eleitorál Guiné-Bisau
Jornalista : Osória Marques
Editór : Cancio Ximenes

