DILI, 21 jullu 2022 (TATOLI)—Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, hateten eleitór sira iha postu adminiatrativu Hatulia B (Ermera), postu administrativu Loré (Lautém) no munisípiu Ataúro, to’o agora atualiza ona kartaun eleitorál hamutuk 3.375-resin.
Notísia Relevante: MAE halo selesaun pur méritu ba administradór Hatulia B no Lore
Diretór STAE ne’e hateten, hosi totál eleitór ne’e munisipiu Ataúro eleitór hamutuk 363, postu administrative Hatulia B eleitór hamutuk 12.000-resin no eleitór iha postu administrativu Loré iha eleitór 3.000-resin.
“Ita-nia atendimentu ba eleitór sira-ne’e kuaze atu konklui hotu ona, iha balun ne’ebé mak seidauk tanba problema dokumentu komprovativu hanesan billete de identidade (BI), sertidaun RDTL maibé dala barak sidadaun balun laiha,” nia dehan ba Agência TATOLI, iha nia kna’ar fatin Caicoli, Dili.
Maibé, nia dehan, hosi totál eleitór refere iha balun ne’ebé rejistu foun ka sidadaun ne’ebé kompleta tinan 16, no ba ferik katuas sira mak difísil atu atualiza no halo kartaun eleitorál foun tanba problema dokumentu la kompletu no sira hela dook hosi vila.
Tanba ne’e, STAE iha planu halo atendimentu movél hodi atualiza katus no ferik sira-nia kartaun eleitorál iha suku sira.
“Ita trasa planu atu fó atendimentu movél ba iha suku sira tanba ita-nia ferik-katuas ne’ebé laiha posibilidade hakat ba sentru atendimentu rejistu iha Munisípiu sira,” nia dehan.
Notísia Relevante: Governu nomea Domingos Soares lidera munisípiu Ataúro
Jornalista : Osória Marques
Editór : Cancio Ximenes
