Agência TATOLI presiza aumenta kobertura iha área rurál
DILI, 28 jullu 2022 (TATOLI)—Peskizadór Organizasaun Naun Govermentál (NGO) La’o Hamutuk, Jonathan Gonçalves, hateten Agência TATOLI, Institutu Públiku (TATOLI, I.P) presiza aumenta kobertura iha área rurál, nune’e munisípiu seluk bele akompaña prosesu dezenvolvimentu iha munisípiu sira seluk.
Notísia Relevante: Ricardo Antunes: “Agência TATOLI tenke mantein no garante independénsia reportajen”
“Ita hatene informasaun importante ba ema hotu, hanesan ita haree TATOLI nia kobertura agora iha ona munisípiu lima hanesan Viqueque, Baucau, Covalima, Bobonaro no RAEOA, tanba ne’e ami hanoin katak ba futuru presiza aumenta kobertura to’o iha nível rurál atu nune’e ema sira iha área rurál no munisípiu sira seluk bele akonpaña prosesu dezenvolvimentu iha munisípiu sira seluk nian mós,” Jonathan Gonçalves, hateten ba Agência Tatoli, relasiona ho komemorasaun ezisténsia Agência TATOLI, I.P ba dala-VI, iha nia kna’ar fatin, Dili, tersa ne’e.
Apresia ba Agência TATOLI, tanba servisu lubuk ida ne’ebé Agência TATOLI halo ona liuhosi fó informasaun ba públiku, tanba ne’e nafatin fó informasaun nune’e ema bele akompaña prosesu iha Timor-Leste, liu-liu iha asuntu ekonomia, sosiál no asuntu oioin.
“Ba ami La’o Hamutuk nia hanoin, katak asuntu lubuk ida-ne’ebé kolega sira hosi Tatoli presiza mós akompaña, bainhira halo kobertura ho totálmente. Liliu informasaun balun ne’ebé ami hanoin katak, ita-boot sira presiza atu nafatin halo kobertura mak kona-ba asuntu Carbon Captur Storage (CCS). Informasaun ida-ne’e importante liu tanba ita hanoin katak, agora dauaun ita-nia Governu iha prosesu atu halo akordu ida ho Austrália ho Santos para atu uza ita-nia kampu bayu-undan, hodi halo kaptura karbon ba iha ne’ebá,” nia dehan.
Aliende ne’e, iha asuntu importante balun mós Tatoli presiza hakle’an mak kona-ba asuntu ekonomia, hanoin ida-ne’e importante mós tanba durante ne’e ekonomia Timor-Leste dependénsia liu ba fundu mina-rai, entaun hanoin katak kolega sira iha Agência Tatoli hakle’an liután kapasidade atu nune’e bainhira halo kobertura ka hakerek bele konvense públiku.
“Tanba, informasaun balun ami hanoin katak Agência Tatoli presiza mós hakle’an kapasidade no informasaun, nune’e bainhira públiku atu asesu informasaun bele entende katak informasaun hirak ne’e importante mós mai ita,” nia esplika.
Kona-ba notisia sira públika iha portál TATOLI, nia katak notisia sira-ne’ebé durante públika iha portál Agência Tatoli durante ne’e La’o Hamutuk akompaña informasaun di’ak, tanba informasaun balun ne’ebé mak La’o Hamutuk mós uza sai hanesan referénsia ba La’o Hamutuk nia peskiza estudu balun.
“Atu hateten de’it ita ema la perfeitu, katak iha buat balun presiza had’ia maibé informasaun hirak ne’ebé públika iha Tatoli durante ne’e bele ajuda ona ami. Tanba ne’e, kolega sira hosi Tatoli hanoin nafatin atu aprende atu oinsa fó nafatin informasaun ne’ebé kredivel no nafatin tau ita-boot sira-nia an katak asuntu polítiku, sosiál, ekonomia labele kahur, nune’e, ema labele hanoin katak iha tendensiozu uitoan ba polítiku. Maibé, ba kolega sira durante ne’e sei la’o tuir koridór hanesan mídia no ba ami hanoin katak durante ne’e sei la’o di’ak hela seidauk halis uitoan ba asuntu tendensiozu ba politiku,” nia dehan.
Jornalista : Nelia Fernandes
Editór : Cancio Ximenes
