BOBONARO, EKONOMIA, MUNISÍPIU

Komunidade Tunubibi husu Governu aselera loke merkadu tradisionál iha fronteira

Komunidade Tunubibi husu Governu aselera loke merkadu tradisionál iha fronteira

xefe aldeiaTunubibi, suku Tapo-Memu, Fernando Raul. Imajen Tatoli/Sérgio da Cruz.

BOBONARO, 03 agostu 2022 (TATOLI) – Komunidade aldeia Tunubibi, suku Tapo-Memu, postu administrativu Maliana, munisípiu Bobonaro, husu Governu aselera loke merkadu iha área fronteira tanba parte Indonézia nian aseita ona.

Xefe aldeia Tunubibi, suku Tapo-Memu, postu administrativu Maliana, munisípiu Bobonaro, Fernando Raul, konsidera Governu ‘lentu’ demais atu loke hikas merkadu tradisionál iha fronteira área Mozon, baliza ho Turiskain, munisípiu Belu, provínsia Nusa Tengara Timur (NTT), Indonézia.

Nia haktuir, foin lalais Prezidente Autoridade munisípiu Bobonaro, Ernesto de Oliveira Barreto, hamutuk ho embaixadór indonezia iha Timor-Leste, Ockto Dorinus Manik ho nia delegasaun vizita no observa rasik ona ho matan kondisaun infraestrutura iha fronteira rai rua nian.

Enkuantu durante vizita ne’e embaixadór Manik mós promete parte nasaun viziñu Indonézia prontu 100% iha kualkér oras no tempu atu funsiona atividade merkadoria iha liña fronteira.

Notísia relevante: Embaxadór Indonézia-PAM Bobonaro observa infraestrutura sira iha fronteira

“Ami (autoridade) nia hanoin ita-nia governu no estadu lentu ou tarde liu, atu responde estadu no governu Indonezia nian tanba sira pronto ona,” nia imforma ba jornalista sira iha, mini edifísiu foun Alfándega, Mozon, tersa ne’e.

Fernando akresenta, iha segunda semana  ne’e autoridade Belu reativa ona merkadu tradisionál iha área liña fronteira Turiskain no parte Haikesak ho Builalu.

Tuir nia, reativa merkadu tradisionál importante tebes no lori vantajen boot ba Timor-Leste tanba bele minimiza atividade tranzaksaun ilegál ba sasán kontra bandu sira. Nune’e mós bele fó rendimentu ba komunidade sira-ne’ebé fa’an produtu lokál.

“Ita fiar katak bele fó serbisu ba joven sira, liuliu sira-ne’ebé hala’o kna’ar kada loron hanesan ojek no gerobak, ne’ebé nia vantajen ne’e barak loos,” nia hateten.

Iha Fatin hanesan, komunidade Tunubibi, Costodio Barreto, reforsa governu presiza iha seriedade aselera duni prosesu loke merkadu tradisionál, tanba dezde pandemia Covid-19 afeta mundu, nasaun rua taka hotu fronteira terrestre, nune’e  transporte privadu la hetan rendimentu.

“Agora foin loke odamatan ne’e, ami sente di’ak uitoan ona, dalaruma loron ida, ema mai ami hetan liu $5, maibé ita taka beibeik entaun sira liu fali hosi dalan ilegál,” nia fó hanoin.

Notísia relevante: Governu koordena hela ho Indonézia atu fahe bee iha mota Malibaka

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!