KAPITÁL, NASIONÁL

AMD sei instala kaixote lixu 4.000 iha tinan ne’e

AMD sei instala kaixote lixu 4.000 iha tinan ne’e

Ekipa saneamentu rekolla hela lixu iha Kapitál Dili. Imajen Tatoli/António Daciparu

DILI, 18 agostu 2022 (TATOLI)—Prezidente Autoridade Munisípiu Dili, Guilhermina Filomena Saldanha, informa Governu liuhosi Autoridade Munisípiu Dili (AMD),sei instala kaixote lixu 4.000 iha tinan ne’e.

Notísia Relevante: Prosesu instalasaun kaixote lixu 4.000 tama ona auditoriu Tribunál Kontas

“Instalasaun kaixote lixu 4.000 kompañia ne’ebé manán na’in, iha kuarta-feira ne’e Diretór Serviso Munisipál Agua Saneamentu no Ambiente ba ona halo enkontru, entaun kompañia manán-na’in sei hetan fali assinatura ida kona-ba note stop procide, nia atu halo prosesu ba ida ne’e depois tuur hamutuk ho membru PMU sira atu re-identifika fila-fali fatin sira. Maibé bele dehan maizumenus 4.000 kaixote ne’e prontu atu ita tau iha tinan ne’e,” Guilhermina Filomena Saldanha hateten ba Agênsia Tatoli, iha nia kna’ar fatin, kinta ne’e.

Kona-ba ekipamentu ba instalasaun kaixote lixu 4.000 ne’e, kompañia sira mak sei hatama no ba prosesu instalasaun kaixote 4.000 ne’e, AMD halo ona sensibilizasaun ba komunidade hodi hatene prosesu instalasaun.

“Sensibilizasaun enjerál ita hala’o ona maibé atu dehan fatin tau iha ne’ebé iha postu administrativu ita halo ona. Tanba ne’e, kuandu kompañia prontu ona, ita tau ona. Tanba bainhira ita tau ona, kompañia ida seluk mós tenke halo ona rekolla lixu,” nia esplika.

Diretór Serviso Munisipál Agua Saneamentu no Ambiente, Hermínio Moniz Ribeiro, hateten progresu hosi implementasaun instalasaun kaixote lixu ne’e agora tama ona iha faze aprovasaun note stop procide, signifika asinatura note stop procide ne’e Ministériu Administrasaun Estatál tenke informa ona ba iha kompañia atu sira bele prepara sira-nia an.

Administrativamente, nia dehan, sira tenke haruka ona pedidu pagamentu adiantamentu, nune’e Munisípiu Dili bele halo pagamentu adiantamentu no hosi ida-ne’e sira prepara ona hodi halo mobilizasaun ekipamentu. Tanba, tuir kontratu ne’ebé iha mobilizasaun ekipamentu ne’e lori tempu to’o fulan lima ka neen.

“Mobilizasaun ekipamentu to’o fulan lima ka neen, entaun depois mobilizasaun ekipamentu mai mak ita foin bele halo instalasaun ba fatin lixu hirak ne’e. Purtantu, ita sei hein lai mobilizasaun ekipamentu hosi kompañia. Maibé, antes ne’e ita tenke prosesa lai prosesu administrativu balun, ita tenke informa ba sira atu sira bele prepara sira-nia pedidu pagamentu de adiantamentu,” nia dehan.

Maske nune’e, prosesu instalasaun kaixote 4.000 ne’e, Autoridade Munisípiu Dili halo ona sensibilizasaun ba komunidade.

“Ami ba ko’alia ona ho autoridade lokál no komunidade sira katak iha tempu badak ekipa sei tun fali mai, nune’e hamutuk ho kompañia halo peskiza ba iha fatin. Portantu, PMU sira ho Munisípiu Dili sei halo joint survey ida ho kompañia sira atu haree oinsá instala fatin lixu hirak ne’e,” nia esplika.

Notísia Relevante: AMD sei koloka kaixote lixu 4000 iha sidade Dili

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!