iklan

NASIONÁL, KAPITÁL

Instalasaun kaixote lixu 4.000 iha faze identifika fatin

Instalasaun kaixote lixu 4.000 iha faze identifika fatin

lixu iha Tasi Tolu, Dili. Imajen/Dok

DILI, 04 setembru 2022 (TATOLI)—Diretór Servisu Munisipál Agua Saneamentu no Ambiente, Hermínio Moniz Ribeiro, informa prosesu instalasaun kaixote lixu 4.000 iha kapitál Dili, daudaun ne’e iha ona faze koordenasaun ba identifikasaun fatin.

Notísia Relevante: AMD sei instala kaixote lixu 4.000 iha tinan ne’e

“Prosesu instalasaun kaixote lixu 4.000 agora iha hela faze koordenasaun ho kompania hirak ne’e, depois atu halo join survey ida hamutuk ho sira hodi ita ba halo identifikasaun fatin. Maibé, ba ekipamentu ita tenke hein fali kompañia ida seluk ne’ebé manán konkursu ba ekipamentu nian. Sira kuandu lori ona ekipamentu mai mak ita foin bele halo instalasaun,” Hermínio Moniz Ribeiro informa ba Agência Tatoli, iha nia kna’ar fatin, Dili.

Nia esplika, ba prosesu hotu kona-ba instalasaun kaixote lixu 4.000 hahú hosi akizisaum to’o fali distribuisaun ekipamentu sira, tuir kontratu ne’ebé iha lori tempu fulan lima (5) to’o neen (6) atu lori ekipamentu sira mai.

“Tanba ne’e, nia instalasaun ita tenke hein kompañia ne’ebé manan konkursu ba ekipamentu nian lori mai, mak foin halo nia instalasaun,” nia dehan.

Maske nune’e, ba prosesu implementasaun instalasaun kaixote lixu 4.000 ne’e, kompañia sira iha ona koñesimentu, tanba halo ona enkontru ho Ministru Administrasaun Estatál (MAE).

“Sira (Kompañia) iha kuiñesimentu ona tanba sira halo ona reuniaun alargada ida ho Ministru (Administrasaun Estatál). Agora daudaun atu prosesa sira-nia note stop procide partikularmente ba kompañia China Nuklear nian sei hein sira-nia prosesamentu ba iha Bank Garansi, depois sira prosesa hotu mak sira foin informa ba atu bele hasai note stop procide,” nia esplika.

Kona-ba planu Autoridade Munisípiu Díli (AMD) sei instala kaixote lixu 4.000 ne’e iha sá fulan, nia hatán, planu instalasaun depende ba ekipamentu ne’ebé kompañia sira haruka hosi rai-li’ur mai Timor-Leste.

“Tuir kontratu ita fó tempu ba sira fulan lima (5) to’o neen (6), kuandu la to’o ida-ne’e signifika di’ak liután, iha tinan ne’e ita bele instala. Maibé, kuandu iha sira-nia prosesu tomak mak tenke lori tempu duni tuir kontratu fulan lima (5) to’o neen (6), ida-ne’e signifika tinan ne’e ita seidauk instala parese iha tinan oin,” nia dehan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!