iklan

NASIONÁL, HEADLINE

Dom Norberto: “Maromak haraik laran luak Timor-Leste hetan kardeál dahuluk”

Dom Norberto: “Maromak haraik laran luak Timor-Leste hetan kardeál dahuluk”

Bispu Dioseze Maliana, Dom Norberto do Amaral. Imajen TATOLI/Francisco Sony

DILI, 06 setembru 2022 (TATOLI)—Bispu Dioseze Maliana, Dom Norberto do Amaral, hateten Nai Maromak haraik laran luak mai Timor-Leste hetan kardeál dahuluk, Don Virgílio Kardeál do Carmo da Silva, SDB, hodi hahí hanai ba Nai tanba Nai laran di’ak no laran luak tebes.

Notísia Relevante: Dom Virgílio Kardeál konvida sarani moris tuir Maromak nia santuáriu

“Hasees an hosi Dioseze Macau hodi sai ba dioseze ida agora kompleta tinan 82, ho Dioseze Baucau tinan 25 no Dioseze Maliana ho tinan 12, Nai Maromak haraik hosi nia laran luak mai ita ba dahuluk no hetan Don ida-ne’ebé naran kardeál iha Timor-Leste. Ita soi duni ba hananu no hanai asaun grasa ida-ne’e, tanba Dom ida mai ita hodi dehan hahi hanai ba Nai, tanba Ita laran di’ak no laran luak tebes,” Bispu Dioseze Maliana, Dom Norberto do Amaral, hateten bainhira hato’o diskursu hafoin misa agradesimentu ba kardeál foun ramata iha Tasi-Tolu, Dili, tersa ne’e

Dom Norberto hateten, ho momentu espesiál ida-ne’e grava tiha ba istória Igreza Katólika Timor-Leste no rai Timor-Leste nian, tanba rai Timor-Leste ne’ebé kiik no nia populasaun tokon ida ho balun de’it, sai ona sentru ba rai hotu-hotu.

“Ne’e duni hodi sarani katólika nia naran ho povu Timor-Leste, hakarak hato’o parabéns ba Dom Vírgilio Kardeál do Carmo da Silva nia an. Sarani Katólika Timor-Leste, neon ksolok ho kontente simu ita-boot no tane ita-boot ho misa ida-ne’e, hosi aas liu lalehan husu boot ba Nai Maromak atu haraik isin di’ak, laran kmaan ba Kardeál hodi halo nia kna’ar ida-ne’e, nu’udar prinsípiu Igreja Katólika nia laran no tuir Santu Padre nia planu ho nia hanoin,” bispu ne’e hateten.

Amu bispu ne’e hateten, hanoin mós iha loron 06 setembru padre na’in-tolu (Hilario Madeira, Tarsisius Dewanto no Fransisco Soares) no povu lubuk ida-ne’ebé mate iha masakre Setembru Negro Suai no husu ba jerasaun foun sira atu banati sira-nia hahalok.

Don Norberto hato’o agradesimentu ba Komisaun Organizadora hosi Governu no Igreja ne’ebé servisu makaas hodi halo sasán sira-ne’ebé uza daudaun ne’e sai ho di’ak no ba susesu no Nai sei retribui hahalok ida-ne’ebé halo ona.

“Agradese mós ba ita hotu nia prezensa iha ne’e, líder istóriku sira, veteranu, eis títulár, membru governu, membru parlamentu nasionál, konfisaun relijioza sira, tribunál, mídia sira, korpu diplomátiku sira, PNTL, F-FDTL, sarani hosi Dioseze Baucau, Dili no Maliana, ba imi hotu nia laran di’ak hotu, Nai sei selu,” nia dehan.

Notísia Relevante: Dom Virgílio Kardeál husu grupu arte-marsiál promove dame

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!