iklan

NASIONÁL, POLÍTIKA

Abdullah Said Sagran: Implementasaun fraternidade umana envolve valór relijiaun

Abdullah Said Sagran: Implementasaun fraternidade umana envolve valór relijiaun

Prezidente Konsellu Kuradór Meskita Anur, Abdullah Said Sagran. Imajen Tatoli/Nelson de Sousa.

DILI, 20 setembru 2022 (TATOLI)—Prezidente Konsellu Kuradór Meskita Anur, Abdullah Said Sagran, hateten implementasaun fratermindade umana iha Timor-Leste (TL) envolve barak valór relijiaun nian.

Notísia Relevante: Fraternidade umana promove diálogu sai instrumentu relevante ba ohin loron

Prezidente Konsellu Kuradór Meskita Anur, Abdullah Said Sagran. Imajen Tatoli/Nelson de Sousa.

“Ida-ne’e kapaas tebes tanba envolve valór barak espesialmente valór relijiaun, ne’e mak ita buka meiu oinsá mak iha konvivénsia komunidade hotu nia laran tenke iha valór sira-ne’e nia laran, entaun ne’e bele mosu hanesan fraternidade umana no amizade. Buat ida-ne’e importante tebes no ita la konsege to’o iha amizade nia laran, enkuantu ita la sente di’ak hanesan fraternidade umana,” Prezidente Konsellu Kurador Meskita Anur ne’e hateten ba Agéncia TATOLI iha lansamentu sentru fraternidade umana Timor-Leste em prol da pas mundiál iha Palásiu Prezidensiál, Nicolau Lobato, Bairru Pite, segunda (19/09) ne’e.

Ne’eduni. Nia dehan, ida-ne’e hanesan lansamentu entaun foin atu la’o ba oin hodi hala’o servisu maibé prinsipál envolve iha valór sira-ne’e.

Timor-Leste hanesan nasaun dahuluk adota dokumentu fraternidade umana envolve buat barak hanesan kona-ba morál, valór relijiaun sira no ida-ne’e mak halo ema hanesan valór kriatura Maromak nian ne’ebé prinsipál tebes, tanba nu’udar fiar na’in sira konserteza fiar metin duni katak ema ne’e Maromak mak kria.

“Ida ne’e oinsá mak ita sosializa ba iha sosiedade nia leet. Líder relijiaun, líder nasaun entaun sira mós adota buat ida-ne’e hodi bele hakmatek. Ne’eduni, ita-nia fé nia laran konserteza ita la hanesan. Enkuantu ita konsidera la hanesan, ita labele tenta atu hanesan ita buka buat sira-ne’ebé ita bele hanesan no hamutuk hanoin. Ida-ne’e mak oinsá ba oin konvense sosiedade tomak,” nia hateten.

Kona-ba implementasaun fraternidade umana ita hala’o mós ho timoroan sira iha timoroan osidental maibé lidér nasionál sira iha rai-laran de’it laiha fraternidade, nia hatán, ho dokumentu fraternidade umana ne’ebé Timor-Leste proklama ona ne’e, ba oin líder nasionál sira bele tuur hamutuk hodi halo diálogu no bele ko’alia ba malu.

“Ida-ne’e inklui problema ita haree oinsa loke dalan ida haree buat sira-ne’e hotu. Agora, hanoin ha’u seida’uk ko’alia barak maibé ita tenke agradese, ho ida-ne’e loké dalan haree ba futuru halo oinsá mak ita moris iha armonia nia laran, bele ko’alia ba dezenvolvimentu. Se dezenvolvimentu hotu-hotu konkorda dezenvolvimentu ba ne’ebé, ba prosperiedade timorense,” nia dehan.

Prezidente konsellu Kurador Meskita Anur ne’e apela, importante tebes ema hotu respeita malu tuir ida-idak nia fé no agradese nasaun TL ho valór prevee artigu sira iha konstituisaun defende direitu hotu-hotu nian, no hanesan sidadaun timoroan iha direitu atu respeita malu, defende ba malu hodi iha hakmatek no pás nia laran.

Enkuantu, nia informa, tuir dadus dadaun ne’e sidadaun musulmanu ne’ebé hela iha Timor-Leste kuaze ema 3.000, ne’ebé hela namkari iha territóriu nasionál.

Notísia Relevante: Vise PM Santa Sé: Timor-Leste nasaun dahuluk proklama fraternidade umana

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!