Outubru, SEAK monta plaka sinalizasaun lima ba patrimóniu arkitektóniku portugés

DILI, 30 setembru 2022 (TATOLI)-Sekretáriu Estadu Arte no Kultura (SEAK), liuhosi Diresaun Nasionál Patrimóniu Kulturál (DNPC, sigla portugués) tuir planu iha fulan outubru tinan ne’e sei monta plaka sinalizasaun lima (5), ba patrimóniu arkitektóniku portugés iha kapitál Dili.
“Ami-nia planu monta plaka sinalizasaun lima (5) ne’e iha outubru no iha trimestrál dahaat ne’e monta ona, tanba kontratu atu prepara plaka sinalizasaun ida ne’e ami prevee de’it orsamentu, nune’e ami halo pedidu ba Diresaun Nasionál Aprovizionamentu mak buka kompañia no prosesa tuir dalan Aprovizionamentu nian. Tanba ne’e, kompañia ne’ebé manan mak ba prepara plaka ne’e, hosi ne’e kompañia ne’e mós sei responsabiliza ba monta plaka sinalizasaun ne’e,” Diretór Nasionál Patrimóniu Kulturál (DNPC, sigla portugués), Gil Paulino Santos Oliveira, hateten ba Ajénsia Tatoli iha nia knaar fatin, Díli, sesta ne’e.
Tuir nia, patrimóniu arkitektóniku portugés ka uma orijen portugés iha Timor-Leste, Arte Kultura, liliu Diresaun Nasionál Patrimóniu Kulturál mak responsabiliza ba parte kontrolu, entaun planu ba monta plaka sinalizasaun ne’e komesa kedas iha 2021 no 2022.
“Tanba, plaka ne’e atu informa katak ne’e Patrimóniu Estadu ne’ebé ho nia valór istóriku no presiza atu konserva no valoriza, tanba ne’e ita tau iha informasaun kabe mós ba rejime juridíku patrimóniu kulturál númeru 33, hosi ne’e atu hateten ne’e patrimóniu Estadu ne’ebé ita presiza atu konserva nafatin nia valór istóriku atu nune’e ita labele lakon nia istória iha tempu ikusmai,” nia esplika.
Maske nune’e, nia akresenta, SEAK tau plaka sinalizasaun lima ba patrimóniu arkitektóniku portugés iha kapitál Dili, tanba SEAK identifika katak, ida ne’e valór istóriku ne’ebé presiza atu fó lalais informasaun kona-ba rejime juridíku patrimóniu kulturál, hosi ne’e atu proteze hela uma ida ne’e.
“Entaun, ita fó prioridade uluk ba fatin lima mak sai hanesan sítiu ba montazen plaka ba 2022. Maibé, ida ne’e ami sei kontinua nafatin iha 2023 tuir orsamentu ne’ebé iha, tanba tuir orsamentu ki’ik entaun ita labele halo aumezmu tempu, maibé ita sei halo tuir faze por faze,” nia informa.
Entretantu, plaka sinalizasaun lima, ne’ebé sei monta iha kapitál Dili hanesan, Casa Europeia, ida iha Kazerna Taibesi, Faról, Dioseze no ida seluk iha Palásiu Governu.
Notísia relevante :SEAK sei halo sinalizasaun ba patrimóniu arkitektóniku portugés iha Dili
Jornalista : Nelia Fernandes
Editór : Rafy Belo

