Ministra Adaljiza hein notifikasaun hosi Tribunál hatán keixa Eis-Konsul Jerál ba Sidney

DILI, 11 outubru 2022 (TATOLI)—Ministra Negósiu Estranjeiru no Kooperasaun (MENK), Adaljiza Magno, hein de’it notifikasaun hosi Tribunál Distritál Dili (TDD) hodi bele ba hatán Eis-Konsul Jerál Timor-Leste ba Sidney Austrália, Luciano Valentim da Conceição, ne’ebé keixa ona nia iha tribunál.
“Ha’u labele halo komentáriu ba ida-ne’e. Prosesu keixa iha dalan entaun se ha’u hetan notifikasaun mak ha’u bele dehan buat ruma,” Ministra ne’e hateten ba jornalista sira iha Parlamentu Nasionál, tersa ne’e.
Maske nune’e, nia dehan, to’o oras ne’e nia parte seidauk simu ka hetan hetan notifikasaun ruma hosi Tribunál, entaun nia sei hein de’it no nia parte prontu atu ba hatán.
Antes ne’e, iha 04 outubru 2022, Eis-Konsul Jerál Timor-Leste ba Sidney Austrália, Luciano Valentim da Conceição, akompañadu hosi Defesór hosi Defensoria Públiku, Sergio Quintas, halto’o keixa ba TDD, hasoru atúal Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, tanba durante fulan-lima iha tinan 2021 la transfere osan operasionál ba konta bankária Konsul Jerál Sidney nian.
Hafoin hato’o keixa ba TDD, Eis Konsul Jerál bá Sidney ne’e informa ba jornalista sira katak razaun halo keixa hasoru Ministra Adaljiza Magno tanba iha fulan marsu 2021, halo deklarasaun públiku katak Governu transfere osan ba konta bankária Konsul Jerál-nia maibé konta bankária mak blokeadu ka muda ona.
“Deklarasaun hosi Ministra Adaljiza Magno, iha fulan-marsu 2021 ne’ebé hateten Governu liuhosi MNEK transfere osan ba konta bankária konsul jerál iha Sidney Austrália, maibé iha prosesu transferénsia osan la tama tanba dehan konta bankária, ha’u mak halo blokeia ka halo mudansa,” Luciano hateten.
Nune’e, halo keixa ho bazea ba artigu 417 iha Kódigu Prosesu Sivíl, katak ema-ne’ebé ho dolo, ka intensaun, tanba prátika faktu sira ilisitu ruma ne’ebé mak fó prejuizu ba ema seluk, nia iha obrigasaun, atu tenke selu indemnizasaun ba ema-ne’ebé mak sofre indemnizasaun.
“Señora Ministra nia deklasaun ne’e la’ós estraga ha’u-nia integridade pesoál nu’udar Xefe Misaun, maibé hamoe mós naran Timor-Leste iha rai-li’ur partikulamente iha rai Austrália,” nia dehan.
Tanba, tuir regra universál hosi nasaun hotu katak Embaixadór ka Konsul Jerál laiha direitu no kompeténsia hodi muda ka altera nota bankária Estadu nian.
“Ita iha lei própriu só Ministeriu Finansa mak iha direitu ba loke no halo aterasaun ba nota bankária. Nune’e Ministra nia deklarasaun iha televizaun no mídia sira la loos no laiha faktu,” nia lamenta.
Defeza hosi Defesór Públiku, Sergio Quintas, hateten nia parte akompaña nia kliente hato’o keixa iha TDD hasoru atuál Ministra Adaljiza Magno, ba kazu ba krime asaun deklarativa de indemnizasaun pur faktu ilísitu iha artigu 417 iha Kódigu Prosesu Sivíl.
“Ohin, ita rejista keixa ida iha tribunál hasoru Señora Adaljiza Magno, bazea ba deklasaun hosi atuál Minsitra katak Eis Konsul Timor-Leste ba Sidney mak troka konta bankária, maibé laiha verdade hosi deklarasaun ne’e,” nia infroma.
Defeza Eis-Konsul Jerál ne’e, konsidera ho deklasaun ne’e hamosu buat prejuizu la patrimoniál no danu lahó materiál ne’ebé daudaun asistidu sofre hela.
“Tribunál mak iha kompeténsia tomak defere no indefere ba prosesu sira-ne’e. Ha’u fiar katak iha tempu badak tribunál bele sita no bolu ona parte kontráriu atu responde,” nia dehan.
Notísia Relevante: Eis Konsul Jerál bá Sidney halo keixa hasoru Ministra Adaljiza Magno
Jornalista : Nelson de Sousa
Editór : Cancio Ximenes

