MNEK sei prioritiza diplomásia ekonomia atrai investimentu mai TL

DILI, 11 outubru 2022 (TATOLI)—Ministéiru Negósiu Estranjeiru no Kooperasaun (MENK) iha proposta Orsamentu Jerál Estadu (OJE) 2023 prevee ho montante $28,370,273, sei fó prioridade ba diplomásia ekonomia hodi atria investimentu mai Timor-Leste (rai-laran).
Notísia Relevante: Ohin, PN hahú halo audiénsia públika ba proposta-lei OJE 2023
“Proposta OJE 2023 MNEK prevee millaun $28-resin ho prioridade barak liu ba operasaun embasada sira, vizibilidade Timor-Leste nian iha área multilaterál, asisténsia konsoladu, ACTL, kooperasaun MNEK, asegura adezasaun ba Asean, nune’e presiza halo tan rekrutamentu ba funsionáriu tékniku profisional, asegura diplomata sira halo programa promosaun ba investimentu halo ekonómia diplomásia. Tanba, ita hotu hatene serbisu importante ida MENK bele halo mak oinsá asegura investimentu mai Timor hodi diversifika ita-nia ekonómia tanba ita-nia osan mina mós menús ba daudaun, ita tenke atrai investimentu mai,” Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten ba jornalista sira hafoin halo audiénsia públika proposta OJE 2023 ho komisaun B trata asuntu Defeza Seguransa no Negósiu Estranjeiru iha Parlamentu Nasionál, tersa ne’e.
Durante audiénsia públika ne’e, MNEK aprezenta mós ezekusaun OJE 2022 daudaun atinjitu ona 80%-resin hosi montante inisiál millaun $24-resin ho rezultadu serbisu sira.
Governante ne’e hateten, haree ba avaliasaun ezekusaun orsamentu bazea ba programa tinan ne’e ba MNEK la’o di’ak tebes mak hosi montante inisiál OJE 2022 ne’ebé iha mai fali 2023 nia orsamentu hetan pakote fiskál aumenta millaun $28-resin.
Mezmu nune’e, governante ne’e la esplika detallu kona-ba rezultadu serbisu saida mak halo ona hosi ezekusaun OJE 2022 ne’e.
Tuir livru anexu XI planu anuál ba serbisu no entidade setór públiku administrativu, ba 2023 MNEK iha programa polítika externa Timor-Leste prevee $22,814,546 ho sub-programa defende no promove interrese TL iha rai-li’ur ho atividade reprezentasaun TL nivél bilaterál, rejional no multilateral, sub-programa kooperasaun ba dezenvolvimentu ho atividade asegura sistema administrativu no operasionál, sub-programa koordensaun asuntu bilaterál no multilaterál ho atividade vizita Estadu, vizita ofisiál serbisu, sub-programa fasilita no koordenasaun instituisional iha ezekusaun polítika externa ho atividade tolu (3).
Sub-programa reforsa no fortalese jestaun no reprezetansaun asuntu karatér multilaterál no rejionál ho atividade rua (2), sub-programa jestaun koordenasaun asuntu bilaterál ho atividade rua (2).
Programa boa-governasaun no jestaun instituisional prevee $5,555,727 ho sub-programa tolu (3) no atividade hitu (7).
Jornalista : Nelson de Sousa
Editór : Cancio Ximenes

