DILI, 12 outubru 2022 (TATOLI)—Ofisiál Finansa iha Autoridade Munisípiu Dili (AMD), Adão Araujo, relata iha fulan-janeiru to’o setembru tinan ne’e AMD rekolla taxa estasionamentu hamutuk $23.886,4.
Notísia Relevante: Abríl-jullu: AMD rekolla taxa estasionamentu $8,271.85
“Hosi janeiru to’o setembru tinan ne’e, Autoridade Munisípiu Dili rekolla ona taxa estasionamentu hamutuk $23.886,4,” Adão Araujo hateten ba Agência TATOLI iha nia kna’ar fatin Díli, kuarta ne’e.
Tuir nia, hosi taxa atividade estasionamentu ne’e Autoridade Munisípiu Dili rekolla hosi fonte rekolla taxa iha estasionamentu iha Avenida Taibesi, Liberdade Imprensa, Avenida 20 de Maio, rua 25 de abril, Travessa Tafui ka Jardim 05 de Maio, Dili.
Maske nune’e, Ofisiál Finansa ne’e haktuir katak taxa estasionamentu hosi janeiru to’o setembru ne’e, Autoridade Munisípiu Dili (AMD) la halo kobransa ba fulan-juñu tanba kupon laiha.
“Juñu ne’e ita la iha osan, tanba iha momentu ne’ebá laiha kupon. Prosesu ne’e demora to’o fulan jullu mak atividade servisu ba rekolla taxa estasionamentu ne’e la’o fali,” nia esplika.
Jornalista : Nelia Fernandes
Editór : Cancio Ximenes
