Novembru, MESSK loke inskrisaun akadémiku 2023 ba finalista asesu UNTL-IPB

OE-CUSSE, 18 outubru 2022 (TATOLI) – Ministéru Ensinu Superiór, Siénsia no Kultura, (MESSK), Longuinhos dos Santos, informa, planu ba proseu inskrisaun ba estudante finalista atu asesu ba Universidade Timor Lorosa’e (UNTL) no Institutu Públiku Betano (IPB) ba tinan akadémiku 2023 sei hahú iha fulan-novembru tinan ne’e.

“Daudaun ne’e MESSK hahú disemina informasaun no kritéria ba munisipíu sira hotu nune’e bele iha koñesimentu, tanba kaléndariu ba diseminasaun ne’e ita hahú ona, ohin RAEOA sei ensera iha 25 outubru kobre hotu ba munisipíu 13, entaun prosesu ba faze inskrisaun foun ba rejime jerál no rejime espesiál sei hahú iha 07 to’o 11 novembru tinan ne’e,” Longuinhos dos Santos, ko’alia bainhira realiza diseminasaun iha Oé-Cusse, tersa ne’e.

Nune’e iha 30 novembru to’o 02 dezembru, ne’e tama ona iha prosesu hahú ezame ba rejime espesiál atu asesu ba UNTL no IPB, no ba rejime jerál hafoin sira rona rezultadu hosi ezame nasionál hosi Ministériu Edukasaun, Juventude no Desportu (MEJD) maka foin bele priénxe formuláriu no bele halo inskrisaun.

Ne’e signifika katak, estudante sira só bele rona ona rezultadu ezame nasionál, foin mak hala’o ninia prosesu tama ensinu superiór públiku nian, atu asesu ba UNTL no IPB.

“Ne’e ho fiar no fundamentu ida katak, kuandu alin estudante sira atu asesu ba ensinu superiór públiku, ida tenke halo diferente katak, ensinu tékniku vokasionál ne’e só bele kompete de’it ba formasaun ne’ebé maka relevante, hanesan ba Fakuldade Saúde, Departamentu Medisina, ne’e labele kompete tanba ne’e mai hosi tékniku vokasionál, ba ensinu sekundáriu jerál, sei fila-fali ba munisípiu idak-idak hodi halo rejistu idak-idak nia eskola,” nia afirma.

Nune’e bainhira hatene ona rezultadu finál ezame nasionál, estudante sira tenke hatene valór kuandu iha interese atu atu kompete ba vaga kursu medisina, tanba barak mak sei tama iha vaga medisina.

“Entaun iha kursu importante sesaun tolu iha ne’ebá, maka ita-boot sei haree mezmu valór finál iha 50 ka 55, maibé valór ikus ne’e mak la to’o valór hitu (7), sei laiha autorizasaun atu kompete, hanesan Biolojia ka mai hosi siénsia naturál, língua portugés, ne’e tenke valór hitu (7), sei valór ne’e la to’o maka sei laiha dalan atu kompete hodi asesu ba UNTL no IPB,” nia fó hanoin.

Tán ne’e, nia fó hanoin ba dirijente edukasaun sira iha munisipiu, profesór sira, katak MESSK hakarak prosesu ida-ne’e la’o ho susesu atubele garante transparánsia, vigór no méritu, nune’e Timor-Leste bele promove kualidade ba ensinu ba aprendizajen no mós kuantidade rekursu umanu iha rai ne’e.

Nia aplea mós ba Komisaun Asesu Ensinu Superiór (KAES), presiza hatudu profionalidade no vigór iha prosesu selesaun ba ensinu superiór públiku iha tinan akadémiku 2023 ninian.

“Ha’u hato’o dezeju boa sorte ba alin estudante sira hosi ensinu sekundáriu jerál no tékniku vokasionál tanba iha tempu badak ita-bo’ot sira sei tuir ezame nasionál hafoin rona rezultadu bele asesu ba ensinu superiór públika ba tinan akadémiku 2023,” nia katak.

Governante ne’e apela ba profesór sira, dirijente sira hosi ensinu sekundáriu jerál no tékniku vokasionál katak, MESSK husu ita-boot sira-nia kolaborasaun ho KAES to’o nia finalidade, estudante sira-ne’ebé atu asesu, no hetan admitidu tama iha UNTL no IPB.

Notísia relevante: MESSK disemina kritéria rejime jerál no espesiál asesu UNTL-IPB iha Oé-Cusse

Jornalista   : Abílio Elo Nini
Editór         : Evaristo Soares Martins