DILI, 24 outubru 2022 (TATOLI)—Ministériu Edukasaun Juventude no Desportu (MEJD) hakarak prosesa kazu diploma falsa hosi estudante na’in-10 iha Eskola Ensinu Sekundáriu Jerál (ESJ) 05 maiu Becora tuir dalan legál tanba konsidera hanesan krime.
“Estudante 10 hasoru aktu ne’ebé konsidera hanesan krime hanesan falsifikasaun dokumentu. Tanba ne’e tenke lori lai ba Tribunál hafoin hetan desizaun maka Ministériu Edukasaun Juventude no Desportu bele fó sai rezultadu,” Ministru Edukasaun Juventude no Desportu, Armindo Maia, hateten hafoin ramata serimónia abertura ezame nasionál iha eskola Ensinu Báziku Sentrál (EBC, sigla portugés) Hera, segunda ne’e.
Ministru dehan, estudante sira-nia direitu sei la lakon no sei kontinua partisipa iha ezame nasionál tanba estudante sira kompleta ona tinan-tolu nu’udar estudante.
“Horiseik ha’u rasik foti ona desizaun hodi fó lisensa ba estudante 10 bele tuir nafatin ezame nasionál maibé sira tenke halo deklarasaun molok tuir ezame tanba konsidera prenxe ona 70% prosesu ensinu aprendizajen nia laran,” nia akresenta.
Notísia relevante: MEJD investiga ona kazu diploma falsa
Tuir governante ne’e, maski estudante sira hetan lisensa tuir ezame nasionál maibé kazu falsifikasaun dokumentu tenke la’o nafatin tuir dalan legál atu nune’e bele rezolve kazu sira hodi futuru labele akontese tan problema.
“Liuhosi akontesimentu no kazu sira hanesan ne’e maka Ministériu Edukasaun Juventude no Desportu bele haforsa liután ninia servisu sira iha baze hodi buka halo identifikasaun ba dokumentu sira ne’ebé tama hosi eskola hotu atu labele mosu tan falsifikasaun sira tuir mai . Ita halo ona atuasaun hosi baze tanba ita iha sistema ne’ebé atu deteta dokumentu orijen no falsu bazeia ba númeru seri diploma estudante sira tanba ne’e automatikamente,” nia tenik.
Iha sorin seluk, Diretór Eskola ESJ 05 maiu Becora, konfesa katak estudante 10 ne’ebé tama ona identifikasaun utiliza diploma falsu, na’in-ida maka la marka prezensa iha ezame nasionál loron dahuluk, enkuantu na’in-sia seluk, parte eskola la halo diskriminasaun.
“Sira nafatin tama hamutuk tuir ezame nasionál ho kolega sira seluk tuir lista ne’ebé taka ona, maibé sira-nia partisipasaun ohin dadeer molok atu realiza ezame hetan akompañamentu hosi parte ministériu hanesan Diretór Jerál Edukasaun Ensinu, Gabinete Jurídiku no parte inspesaun,” nia dehan.
Jornalista : Tomé Amado
Editora : Julia Chatarina
