Uma kreda sente lakon bibi atan di’ak Pe. Antonio Alves

DILI, 24 outubru 2022 (TATOLI)—Pe. David Alves da Conseição hateten, uma kreda sente lakon bibi atan di’ak Pe. Antonio Alves, tanba sarani aumenta númeru maibé padre sira hetok uitoan tebes tanba padre sira mai hosi sarani no familia nia oan, nune’e igreja kontinua sente lakon.

Notísia Relevante: Família entrega Pe. Antonio nia mate-isin ba kreda haloot iha Maloa

Nia hatutan, sai Nai Lulik katak família ema hotu nian no sarani hotu nia família no igreja hanesan familia boot no Maromak nia família boot Kristu ninian. Nai Lulik ida-idak Nai Maromak fó grasa espesiál atu nia la’o iha kreda, tanba Nai Lulik ida lakon nia karisma, matenek no nia esperiénsia ne’ebé Nai Maromak fó atu bele sai hanesan grasa ba ema seluk.

“Tanba ne’e, santa kreda kontinua sente lakon nia ema ida-ne’ebé ita hatene katak, sarani ohin loron aumenta númeru maibé padre sira hetok mate no menus tebes. Tanba padre sira mai hosi sarani no familia nia oan, ne’ebé igreja kontinua sente lakon,” Pe. David Alves da Conseição hateten ba jornalista sira, hafoin preside misa requiem ba Pe. António Alves, iha Igreja Motael, Dili, segunda ne’e.

Nia hateten, liuliu igreja Motael sente lakon aman espirituál hanesan Pe. António Alves tanba Motael ne’ebé iha esperéensia kuiñese Amu António Alves ne’e nia kómiku no halimar-dór.

“Ha’u hanoin Motael sente lakon avó no aman espirituál ida iha fatin ida-ne’e,” Eis Pároku Motael ne’e hateten.

Tanba ne,e nia konvida sarani hotu-hotu bainhira Nai Lulik ida mate, dala ruma Nai Lulik sei moris hotu-hotu iha independénsia hodi ko’alia Nai Lulik nia frakeza, hanesan iha Motael ne’e dala ruma Nai Lulik ida ne’e toman demais ho sarani sira no dala ruma sarani sira ladún gosta.

“Sarani sira ko’alia nia frakeza ko’alia ida-ne’e, ko’alia ida ne’ebá maibé ha’u hanoin tempu ida ne’ebé mak Nai Lulik mate sarani sira keta haluha. Iha tempu ruma ne’ebé imi ko’alia Nai Lulik nia frakeza no aat maibé bainhira nia mate ona keta haluha nia no nia mós halo netik buat ruma ba imi. Tanbe ne’e, reza netik ba nia no husu perdaun ba nia frakeza, nia sala sira no husu Na’i Maromak hatudu nia gloria ba nia espíritu no ba ninia klamar,” nia apela.

Maske nune’e, Amu Antonio Alves hanesan Nai Lulik ida-ne’ebé kleur iha Austrália no iha tempu ukun an mak nia hahú mai iha Timor-Leste.

“Bainhira nia mai parikia dahuluk ne’ebé nia ajuda mak Parokia Santo António Motael no buat lubuk ida nia halo iha Motael. Maibé, nia ema simples, mezmu nia tempu kleur tinan 20-resin iha Austrália, maibé nia mai hanesan ema simples no haksolok ho nia vida iha Igreja Motael,” nia dehan.

Hosi ida ne’e, espresaun ne’ebé hatudu katak nia padre ne’ebé simples tanba nia sempre dehan nia António Caicoli, no buat seluk ne’ebé mak sarani Motael sira espresa mak kuandu sarani sira husu buat ruma ba nia, nia dehan imi halo de’it tanba Pároku Bispu Alberto hanorin imi buat hotu, entaun mai atu servisu hamutuk ho imi de’it.

Eis-Pároku igreja Santo António Motael ne’e mós aumenta, nia parte haree iha Amu António Alves, ema simples ne’ebé haraik an maibé nia vida orasaun no nia vida dedikasaun nian.

“Memória ida ne’ebé, ha’u sei hanoin mak hanesan Nai Lulik ida-ne’ebé kalan toba la di’ak, iha tuku 03h00 dadeersan ne’e, nia kaer tersu no ba tuur iha igreja laran hodi reza. Ne’ebé ita hatene, iha misa tuku 06h30 dadeersan maibé iha tuku 03h00-04h00 tuur hela ona, ida-ne’e ba ema katuas ne’e la’ós kma’an no fasil ida. Maibé, iha ne’ebá mak Maromak bolu nia atu deskobre fila-fali katak ‘ó presiza ha’u bainhira ó la dukur, ó tenke besik mai ha’u no buka ha’u. Ne’ebé iha momentu ne’ebé ó kbiit laek ha’u mak ó-nia kbiit iha momentu ne’ebé mundu gloria nian, o labele buka ona, ha’u mak ó nia gloria,” nia haktuir.

Nune’e, nia dehan. Pe. António Alves rai hela ezemplu no lisaun ida ba Nai Lulik sira hotu atu bele banati tuir buat ruma no ba sarani sira, tanba buka Maromak la’ós Nai lulik sira de’it maibé buka Nai Maromak no fiar iha Nai Maromak no hadomi Nai Maromak hodi hadomi malu ne’e, hanesan obrigasaun ida bele banati tuir.

Jornalista : Nelia Fernandes

Editór       : Cancio Ximenes