Entre mídia Online 10, públiku asesu portál Agência TATOLI, I.P aas liu
DILI, 10 novembru 2022 (TATOLI)—Xefe Departamentu Peskiza no Ánaliza Mídia iha Ministériu Asuntu Parlamentár no Komunikasun Sosiál (MAPKOMS), Lidia Asunssão das Neves, relata tuir rezultadu peskiza ne’ebé MAPKOMS haktuir katak entre mídia Online 10 iha Timor-Leste ne’e, publiku asesu liu notísia iha portál Agência TATOLI, I.P aas liu to’o atinje 38%.
Notísia Relevante: Rezultadu peskiza MAPKOMS hatudu sidadaun TL 65,48% asesu televizaun
“Ita haree kona-ba asesu portál ne’ebé mak públiku gosta atu ba heree ka akompaña sira-nia notísa sira, mak iha ne’e, públiku asesu liu notísia iha portal Agência TATOLI, I.P atinje 38% duke mídia on;ine sira seluk,” Xefe Departamentu Peskiza ne’e informa ba jornalista sira, iha semináriu nasionál kona-ba sidadaun-nia asesu ba meiu komunikasaun sosiál iha Timor-Leste, iha salaun Delta Nova, Dili, kinta ne’e.
Entretantu, nia hatutan, maiória haree ka lee-na’in sira gosta tama de’it iha varanda iha oin de’it, haree liu deit notísia saida mak mosu maibé depois sira sai fila-fali sira la haree konteúdu notísia saida mak iha ne’eba ne’e iha 17%.
Xefe peskiza ne’e dehan, 10% hatan de’it sira gosta tama portál sira hodi haree notísia kona-ba edukasaun nian, 10% polítika nian, 8% gosta haree kona-ba asuntu saúde nian, 7% gosta kona-ba ekónomia, defeza no seguransa, enkuantu 6% iha ne’e gosta ba haree opiñiaun, avizu no públisidade sira, 5% gosta ba haree lee no justisa nian, notísia sira hosi munisípiu, programa desportu sira, 4% gosta haree kona-ba advertoriál no notísia selu-seluk tan.
Enkuantu mídia sia (9) seluk ne’ebé atinje persentazen depois TATOLI, I.P mak hanesan mídia Tempo Timor 14%, Neon Metin 13%, Lafaek News 12%, Timor News 10%, Naunil Mídia iha 9%, The Dili Weekly, Oekusi Post, Lusa no Portál Notísia seluk iha 1%.
Tuir rezultadu peskiza ne’e fasilidade ne’ebé sidadaun sira utiliza barak liu hodi asesu ba internet hanesan mobile android atinje 94%, laptop 4%, komputadór 2%.
Asesu ba portál notísia sira ho persentazen total hamutuk 25.81%, la asesu 74.19%, portál Estadu asesu 21.48%, la asesu 78.52%, portál telekomunikasaun asesu 38.63%, la asesu 61.37%, blogspot asesu 8.48%, la asesu 91.52%, mídia sosiál asesu 98.60%, la asesu 1.50%.
Jornalista : Osória Marques
Editór : Cancio Ximenes
