iklan

NASIONÁL, KAPITÁL

Pesoál limpeza Cristo Rei preokupa pesoál seguransa seidauk hala’o servisu

Pesoál limpeza Cristo Rei preokupa pesoál seguransa seidauk hala’o servisu

Uma Gazebo iha Areia Branc-Cristo Rei ne’ebé tohar no monu. Imajen Tatoli/Nelia Fernandes.

DILI, 23 novembru 2022 (TATOLI)—Pesoál limpeza iha jardin Cristo Rei (CR), Cancio da Silva, preokupa ho pesoál seguransa ne’ebé Autoridade Munisípiu Dili (AMD) koloka ona iha jardin Cristo Rei maibé to’o agora seidauk hala’o servisu.

Notísia Relevante: AMD koloka ona pesoál seguransa iha jardin kapitál Dili

“Ha’u haree pesoál seguransa iha jardin Cristo Rei nian ema seidauk mosu mai to’o agora, hanesan ema sira hosi ekipa seguransa nian ema-na’in ualu (8) no ida (1) de’it mak tama to’o agora ho naran Vicente, maibé na’in-hitu (7) seluk la tama to’o agora,” Cancio da Silva hateten ba Agéncia Tatoli, iha jardin Cristo Rei, Díli, kuarta ne’e.

Pesoál seguransa iha Jardin Cristo Rei momentu sira ba halo konta bankária sira kompletu, maibé la fila mai servisu no ida de’it mak tama to’o agora.

“Entaun, ho ida ne’e, karik asina kontratu ona tenke fila mai servisu nu’udar seguransa. Tanba iha ne’e, área turizmu nian ne’ebé hanesan problema mós iha oioin de’it no seguransa sira-ne’e momentu la tama, ami mak iha ne’e maibé sira (vizitante) halo fera lampu sira iha ne’e,” Cancio hatutan.

Pesoál seguransa sira-ne’e, Autoridade Munisípiu Dili koloka ona ba jardin sira iha kapitál Dili, maibé iha Cristo Rei sira la mai to’o agora ne’e karik sira (pesoál seguransa) iha problema ruma, tenke bolu sira ba iha munisípiu rezolve tanba ema barak hakarak atu tama serbisu.

Administradór Postu Administrativu Cristo Rei, Munisípiu Dili, Venancio Tavares, hateten daudaun seguransa hosi Munisípiu Dili ba área turístiku Cristo Rei (CR) iha ona maibé to’o ohin loron nia ladauk simu lista naran ba seguransa sira.

“Ita-nia seguransa sira iha ona maibé ha’u seidauk hetan lista no ha’u sei husu lista iha ne’ebá (Munisípiu Dili), nune’e ha’u atu halo órariu lista prezensa hodi kontrola. Alainde ne’e, ha’u ezije hela lista ne’e maibé seidauk fó mai ha’u, tanba iha balun seidauk asina kontratu ha’u la hatene maibé ha’u prontu ezekuta atu kontrola. Tanba, ita ko’alia karik rekruta la’ós ha’u mak rekruta, maibé ha’u prontu ezekuta,” nia dehan.

Adjuntu Prezidente Autoridade Munisípiu Dili, António Moniz Clau, hateten iha jardin Cristo Rei, Autoridade Munisípiu Dili iha pesoál seguransa hamutuk 12 no hosi ne’e na’in-neen asina ona kontratu maibé iha na’in-neen seluk sei haree hela sira-nia kontratu.

“Tanba, iha sira-nia dirasaun ami bolu mós to’o agora seidauk mai no ami sei buka hela. Maibé, atu hateten ida-ne’e, ami-nia responsabilidade no ha’u hakarak buka tuir ida-ne’e. Se sira lakohi servisu ita foti desizaun atu hasai. Maibé orsida ha’u mai konfirma fali ho Administradór Postu Cristo Rei katak, pesoál seguransa iha jardin Cristo Rei sira lakohi servisu ita troka kedas sira. Tanba ne’e, ita garante semana oin pesoál seguransa hamutuk 12 tenke iha ne’ebá ona,” nia dehan.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!