iklan

INTERNASIONÁL, DESPORTU, OÉ-CUSSE (RAEOA)

Lorensu okupa segundu-lugar iha kompetisaun Taekwondo open turnamen KAJATI Kupang

Lorensu okupa segundu-lugar iha kompetisaun Taekwondo open turnamen KAJATI Kupang

Treinadór Taekwondo RAEOA, Jacob Efi, prepara atleta Lorensu Binsasi atu kompete iha GOR Kupang. Imajen Tatoli/Abílio Elo Nini.

KUPANG, 11 dezembru 2022 (TATOLI)–Atleta Taekwondo hosi RAEOA, Lorensu Binsasi (idade 9), sente kontente tanba saai segundu-lugar iha kompetisaun Taekwondo iha open turnamen eventu Kepala Kejaksaan Tinggi (KAJATI) ne’ebé realiza iha Gedun Desportu Kupang, provinsia Nusa Tenggara Timur (NTT), Indonézia.

Notísia Relevante: Halakon atleta haat, ‘Adelaide Colo’ okupa primeiru-lugar iha eventu KAJATI

Lorensu Binsasi moris iha Oé-Cusse 2013, Nia hahú envolve an iha Taekwondo ho idade tinan lima no kontinua treinu to’o ohin loron. Maske tinan sei ki’ik maibé nia konsege hetan medalla osan mutin (segundu-lugar) iha 2020 bainhira partisipa iha kompetisaun Preziden-CUP ne’ebé realiza iha GMT Dili.

Ho esperieénsia ida-ne’e, sabadu (10/12 )ne’e, Lorensu Binsasi partisipa no kompete ho atleta Taekwondo sira seluk iha kompetisaun Taekwondo open turnamen eventu Kepala Kejaksaan Tinggi (KEJATI) iha Kupang.

Iha eventu ne’e, Lorensu Binsasi liu selesaun iha klase pra-kadet hamutuk na’in-haat ho todan hanesan kilograma 28. Atleta na’in-haat ne’e mak hanesan Lorensu Binsasi hosi RAEOA, Michael Dadu hosi Kupang, Mart Bonglay hosi Kupang, Mario Nong Christian hosi Timur Tengah Selatan (TTS).

Ho ninia esforsu no matenek ne’ebé nia iha, to’o ikus lori Lorensu Binsasi okupa iha segunda-lugar hafoin halakon atleta na’in-rua seluk iha semi-finál. Nune’e, tanba hetan sorte di’ak, nia konsege hakat tán ba faze finál atu hadau fatin primeiru-lugar nian maibé ninia mehi atu hadau fatin dahuluk nia la konsege tanba lakon ho atleta Michael Dadu hosi Kupang.

“Ha’u sente kontente tanba mai kompete iha Kupang hetan juara dua. Uluk, ha’u iha Díli mós hetan juara dua. Ha’u kontente tebes tanba ami-nia klase ne’e ha’u halakon na’in-rua kedas. Sorte kolega halakon ha’u ne’e, nia aas, se lae ha’u bele sai juara satu,” Lorensu Binsasi hateten ba Agência Tatoli iha Kupang.

Nune’e, ho prestasaun ida-ne’e, nia promete sei kontinua treinu nafatin hodi prepara tan atu kompete iha eventu seluk atu bele okupa iha primeiru-lugar.

“Sorte ha’u nia kolega ohin halakon ha’u ne’e nia ain aas liu fali ha’u. Se ami na’in-rua hamrik hanesan karik, ha’u manán ona nia. Ha’u fiar an tanba ha’u la tauk, soké nia hamriik dook mak lolo ain mai kona ha’u, ida-ne’e mak ha’u lakon. Maib’e ha’u sei treinu nafatin, kuandu iha kompetisaun hanesan ne’e, ha’u sei manán no mehi hakarak sai sai primeiru-lugar,” nia dehan.

Iha fatin hanesan, Nna aman Remigio Binsasi haktuir kronolojia durante Lorensu Binsasi envolve iha desportu Taekwondo ne’e tanba desde sei ki’ik nia hakarak tebes atu tama Taekwondo.

“Nia tama treinu ne’e ki’ik-oan hela, nia tama iha 2017 to’o agora. Agora nia moris iha 2013, moris foin to’o tinan lima, nia mak husu mai ha’u, dehan apá ha’u tenke treinu Taekwondo. Entaun, kada lorokraik, ha’u akompaña ba treinuno to’o toman tiha, nia komesa la’o ho nia kolega. Hosi ne’e, nia nunka falta treinu tanba fatin ne’e besik uma,” nia haktuir.

Hanesan aman, nia parte kontente no hato’o agradesimentu ba treinadór sira, tanba liuhosi motivasaun oferese matéria teori no prátika, nune’e nia oan bele hetan rezultadu ho segundu lugar ba dala-rua ona, primeiru iha Díli no tinan ne’e hetan tán segundu lugar iha KEJATI Kupang.

Treinadór Taekwondo RAEOA, Jacob Efi, hato’o agradesimentu ba atleta Lorensu Binsasi tanba nia konsidera ninia atleta okupa segundu-lugar ne’e nu’udar esforsu ida atu hamorin Oé-Cusse nia naran no Timor-Leste nia naran iha Kupang, Indonézia.

“Primeiru ha’u agradese tanba labarik ne’e nunka tauk atu kompete, ne’ebé nia mental juara iha ona, maibé nia badak. Bainhira hasoru atleta ain aas sira, nia lolo ain la to’o, ida-ne’e mak nia lakon. Iha Díli mós hanesan maibé hanesan treinadór ha’u orgullu tanba foti ona Oé-Cusse nia naran di’ak no ita mai sei fila ho rezultadu,” nia dehan.

Tuir kalendáriu ba open turnamen eventu KAJATI realiza durante loron tolu, hahú sesta (9/12) to’o domingu (11/12).

Atleta sira-ne’ebé partisipa atu kompete iha eventu ne’e hamutuk dozan 32 ho totál atleta na’in-845 no hosi atleta na’in-845 ne’e maiória mane hamutuk 495 no feto-317 inklui atleta hosi Timor-Leste.

Regulamentu ne’ebé fó sai hosi komisaun organizadora KAJATI nian mak atleta sira kompete ho kategória pra-kadet A ba idade tinan neen (6) to’o hitu (7), pra-kadet B  ba idade ualu (8) to’o sia (9), pra-kadet C ba idade 10 to’o 11, pra-kadet D ba idade 12 to’o 14, nune’e mós seniór no junior.

Daudaun ne’e, atleta taekwondo Lorensu Binsasi hala’o estudu iha ensinu Primaria Katolika Santo António Rejiaun Oé-Cusse, maibé nia sempre fahe tempu dadeer ba eskola no lorokraik kontinua ba treinu Taekwondo iha Asosiasaun Taekwondo Rejiaun Oé-Cusse.

Jornalista : Abílio Elo Nini

Editór       : Cancio Ximenes

iklan
iklan

Leave a Reply

iklan
error: Content is protected !!