Xefe suku Metiaut husu Governu kompleta dadus distribuisaun Cesta Bázika
DILI, 22 dezembru 2022 (TATOLI)—Xefe suku Metiaut, postu administrativu Cristo rei, munisípiu Dili, Mateus Inácio da Costa, husu Governu liu-liu Ministériu Administrasaun Estatál (MAE) no Ministériu Turizmu Komérsiu no Indústria (MTCI) atu aselera kompleta dadus distribuisaun Cesta Bázika ba komunidade.
Notísia Relevante: Dadus la kompletu, komunidade Metiaut hapara distribuisaun cesta bázika
“Ha’u hanesan xefe suku sujere ba MAE no MTCI tenke buka malu atu oinsá koopera malu tuir dadus ne’ebé iha, tanba dadus ne’ebé mai hosi MTCI katak lista aprovadu hamutuk xefe família 163 no abitante hamutuk 386, entaun ida-ne’e dadus la loos. Ne’ebé, se sira hadi’a tenke lalais ona, kuandu keleur ha’u hanoin mak to’o 28 no 29 ba leten komunidade hakarak halo konferensia imprensa,” Mateus Inácio da Costa hateten ba Agénsia Tatoli iha nia kna’ar fatin, Metiaut, kinta ne’e.
Xefe suku mós labele bandu komunidade nia direitu tanba komunidade mak halo konferensia imprensa la’ós orientasaun hosi xefe suku no xefe aldeia. Tanba ne’e rekomenda ba parte MAE no MTCI tenke rezolve lista ne’e lalais.
Tuir nia, iha prosesu distribuisaun Cesta Bázika ba komunidade iha aldeia 17 Abril parte MTCI hateten sira-nia parte simu lista hosi MAE, maibé lista ne’ebé loos mak komunidade simu hotu ona subsídiu fim do ano $200 ba uma kain, maibé tanbasá Cesta Bázika ne’e lista komunidade sai problema.
“Nune’e, atu hadi’a dadus karik hadi’a lais bá, se lae ami tenke bolu mídia tanba ami hela iha Dili, ne’e la’ós iha área rurál,” nia dehan.
Aliende ne’e, parte MTCI hateten Cesta Bázika ne’e povu nia direitu tuir lei hateten maibé tanbasá suku Metiaut iha aldeia 17 Abríl seidauk simu Cesta Bázika.
“Horbainhira iha akontesimentu la konsege distribui Cesta Bázika, parte MTCI mai hateten Cesta Bázika ne’e povu nia direitu tuir lei, entaun ami-nia direitu iha ka lae. Se hasoru loron boot ida hanesan ne’e, ami bele mós goja ami-nia direitu tuir loron boot Timor nia ka lae,” nia hateten.
Entretantu, tuir nia, suku Metiaut hamutuk aldeia tolu, hosi ne’e aldeia rua hanesan Karungulau no Fatucama simu ona Cesta Cázika no aldeia 17 Abríl hoxefe família hamutuk
244 no abitante 1.213 mak seidauk simu Cesta Bázika.
Jornalista : Nelia Fernandes
Editór : Cancio Ximenes
