DILI, 05 janeiru 2023 (TATOLI)–Vise Ministra Solidariedade Sosiál no Inkluzuan (MSSI), Signi Chandrawati Verdiál, hateten sidadaun sira-ne’ebé mak la simu no naran tama reklamasaun inklui la mosu iha fatin pagamentu ne’e, atu selu reklamante ka lae ne’e sei hein desizaun hosi Konsellu Ministru (KM).
Notísia Relevante: Suku Colmera rejista reklamante subsídiu $200 hamutuk 70
“Ita tenta buka dalan ida para bele rezolve, mak dalan altera dekretu-lei balun tanba iha ne’ebá la prevee ita atu selu reklamante. Maibé ida-ne’e desizaun polítika, karik iha posiblidade ka lae, ne’e kabe ba desizaun Konsellu Ministru,” Sigbi Chandrawati Verdiál hateten ba jornalista sira, hafoin halo lansamentu ba aihan nutritivu ba inan fó susu no labarik tinan ida mai kraik, iha sede suku Wenunuk, Metinaro, kinta ne’e.
Reklamante sira atu hetan sira-nia direitu ka lae ne’e desizaun hosi KM la’ós MSSI mak deside, tanba dekretu-lei la fó dalan ba ida-ne’e no tanba iha ne’ebá la dehan kona-ba sé mak merese atu simu inklui laiha reklamasaun.
“Kestaun direitu ita bele luta maibé desizaun KM nian no presiza Prezidente Repúblika tenke konkorda mak hafoin ita halo pagamentu,” nia dehan.
Tuir dadus hosi MSSI nian hatudu katak ekipa pagamentu selu ona uma kain hamutuk 308.000-resin hosi totál benefisiáriu 339.954 ne’ebé mak iha nasionál hamutuk 318.570 no Rejiaun Administrativa Espesiál Oé-Cusse Ambeno (RAEOA) hamutuk 21.384 no osan ne’ebé mak selu ona hamutuk $61.673.600 ho osan alokadu $67.990.800.
Bazea ba Dekretu-Lei Nú. 37/2022, 25 maiu, ne’ebé mak hetan alterasaun hosi Dekretu-Lei Nú. 82/2022, 11 novembru, katak uma kain ka benefisiáriu sira-ne’ebé mak elizivél ba programa subsídiu fim do ano mak uma kain hirak ne’ebé laiha ninia membru uma kain hetan rendimentu kafa fulan ho forma regular $500 ka liu, nomós uma kain ne’ebé rejistu ona iha livru rejistu suku iha teritóriu nasionál to’o loron 28 fevereiru 2022.
Jornalista : Osória Marques
Editór : Cancio Ximenes
