DILI, 17 janeiru 2023 (TATOLI)–Ministru Administrasaun Estatál (MAE), Miguel de Carvalho, husu ba partidu polítiku sira atu orienta nia militante sira atu partisipa iha Resensiamentu Eleitorál no Atualizasaun Baze Dadus.
Notísia Relevante: STAE apela ba sidadaun TL partisipa iha resensiamentu eleitorál
“Baibain, partidu polítiku sira sempre hala’o kampaña eleitorál iha fatin iha munisípiu sira. Ha’u husu ba partidu polítiku sira atu informa ba sira-nia militante no apoiante sira atu halo rejistu no atualiza baze de dadus,” Governante ne’e hateten iha serimónia abertura lansamentu resensiamentu eleitorál no atualizasaun baze dadus iha Sekretariadu Tékniku Administrasaun Eleitorál (STAE), Caicoli, tersa ne’e.
Diretór Jerál STAE, Acilino Manuel Branco, hateten aktu resensiamentu eleitorál no atualizasaun baze dadus mak garante eleitór sira-nia direitu votu iha tempu votasaun.
“Tanba ne’e, laiha resensiamentu eleitorál no atualizasaun baze dadus mak sei laiha eleisaun. Tanba ne’e, aktu rejistu eleitorál ne’e sei fó oportunidade ba ema hotu atu garante sira-nia direitu votu iha tempu votasaun. Nune’e lansamentu ohin ne’e importante tebes ba populasaun tomak, liu-liu ba eleitór foun sira atu rejista sira-nia kartaun eleitorál no ba ema sira seluk hodi atualiza sira-nia kartaun iha postu administrativu sira,” nia dehan.
NUne’e, nia husu ba autoridade lokál no partidu polítiku sira atu mobiliza populasaun iha fatin oioin atu bele partisipa iha rejistu eleitorál iha país ida-ne’e.
Pontu fikál hosi Kongresu Nasionál Rekonstrusaun Timor-Leste (CNRT), Bidodato C. dé Jesus, hateten maske partidu polítiku sira iha obrigasaun síviku atu informa servisu ruma hosi órgaun eleitorál sira, hanesan rejistu eleitorál no atualizasaun baze dadus kona-ba kampaña eleisaun sira iha munisípiu sira hotu iha seman nia rohan nian.
“Ami konkorda ho mensajen hosi Ministru Administrasaun Estatál nian atu informa ba sosiedade, liu-liu ba ami-nia militante no apoiante sira atu rejista no atualiza baze de dadus,” nia dehan.
Pontu Fokál partidu FRETILIN, Flavio Maria Guterres da Silva, konkorda ho deklarasaun hosi Ministru Administrasaun Estatál katak presiza orienta apoiante sira atu tuir aktu resensiamentu eleitorál no atualizasaun baze dadus.
“Rejistu eleitorál no atualizasaun baze dadus nian nu’udar aktu ida hosi mandatu konstitusionál ba sidadaun hotu-hotu iha nasaun ne’e. Tanba ne’e, ami-nia partidu sei informa ba populasaun liuhosi kampaña eleitorál iha rai-laran,” nia dehan.
Jornalista : Osoria Marques
Editór : Cancio Ximenes
